पूर्वअर्थमन्त्री तथा नेकपा एमालेका उपाध्यक्ष विष्णु पौडेलले खेल र खेलाडीको क्षेत्रलाई फराकिलो गरी विकास गर्ने बताएका छन् । पौडेलले खेल क्षेत्रमा गरिने लगानी व्यर्थको नभई राष्ट्रले गर्नैपर्ने लगानी भएको बताए । उनले त्यसको लागि अनूकूल परिस्थित र वातावरण आफूले निर्माण गर्ने स्पष्ट पारे । 

मदन भण्डारी स्पोर्टर्स एकेडेमीले शनिवार बुटवल आयोजना गरेको खेलाडी प्रशिक्षण तथा खेलप्रेमीहरूको बृहत भेलामा बोल्दै रुपन्देही–२ बाट प्रतिनिधि सभा सदस्य पदका उम्मेदवारसमेत रहेका पौडेलले खेल क्षेत्रमा सम्पूर्ण समस्या समाधान गर्न आफू तयार रहेको दाबी गरे । 

‘ऊर्जाशील जीवन बिताएका खेलाडीको सम्मानपूर्वक बाच्नको लागि हामीले निर्वाहभत्ता, निःशुल्क जीवन बीमा, दुर्घटना बीमासँगै खेल पूर्वाधारको लागि काम गर्नेछौँ’, पूर्वखेलकूदमन्त्री समेत रहेका पौडेलले भने । उनले थपे, ‘खेल क्षेत्रको उन्नति र खेलाडीको स्वाभिमानको पक्षमा काम गर्नेछौँ । खेल जीवनपछि सहज जिविका निर्वाहको उचित प्रबन्ध गर्नेछौँ ।’ 

नेपालमा खेलकूदको क्षेत्रमा अभूतपूर्व सम्भावना रहेको बताउँदै बुद्धसँग खेललाई जोडेर प्रोमोशन पनि गर्न सकिने उनले बताए । हाई अल्टिच्यूट स्पोटर््समा जान पनि सकिने सम्भावना रहेका उनको भनाइ छ । राज्यका खेल सम्बद्ध संगठनले गर्न नसकेको काम मदन भण्डारी स्पोटर््स एकेडेमीले गरेकोसमेत पौडेलले बताए ।