प्रधानसेनापति प्रभुराम शर्मा आइतबार एकैदिन दुई पृतना हेडक्वार्टर र एक गणको निरीक्षण भ्रमणमा पुगेका छन् ।  शर्मा रुपन्देहीको बुटवलस्थित मध्य पश्चिम पृतना हेडक्वार्टर, कैलालीको तेघरीस्थित सुदूर पश्चिम पृतना हेडक्वार्टर र दाङको भरतपुरस्थित रणसिंहदल गणको निरीक्षण भ्रमणमा पुगेका हुन् ।

 निरीक्षण भ्रमणको दौरानमा उनले पृतना हेडक्वार्टरहरु तैनाथीको वर्तमान अवस्था, जिम्मेवारी इलाका, प्रदेशहरुसँगको समन्वयसहित आसन्न प्रतिनिधि सभा तथा प्रदेश सभा निर्वाचनको एकीकृत सुरक्षा योजनाबारे जानकारी हासिल गरेका थिए । साथै गणको वस्तुस्थितिका बारेमा जानकारी लिँदै आवश्यक निर्देशन दिएको सैनिक जनसम्पर्क तथा सूचना निर्देशनालयले जनाएको छ। 

आजै, प्रधान सेनापति शर्माले निर्वाचनको सुरक्षार्थ कपिलवस्तुको चन्दौटा ईलाकामा स्थापना भएको कम्पनी अपरेटिङ बेसको पनि निरीक्षण गरेका छन् ।

रक्षा सचिव  किरणराज शर्माको सहभागिता रहेको उक्त निरीक्षण भ्रमणको दौरानमा प्रधान सेनापति शर्माले लुम्बिनी प्रदेशका प्रदेश सचिव दीपक कुमार काफ्ले तथा रुपन्देहीका सुरक्षा निकायका प्रमुखहरुसँग अन्तरक्रिया समेत गरेका थिए।

 दुई दिने निरीक्षण भ्रमणको क्रममा रहेका प्रधान सेनापति  शर्माले सोमबार सुर्खेतको निमारेस्थित  उत्तर पश्चिम पृतना हेडक्वार्टरको निरीक्षण भ्रमण गर्नुका साथै अछाम र दैलेख जिल्लामा स्थापना गरिएका कम्पनी अपरेटिङ बेसको निरीक्षण भ्रमण पनि गर्ने कार्यक्रम रहेको सेनाले जनाएको छ ।