पूर्व प्रधानमन्त्री एवं नेकपा एकीकृत समाजवादीका सम्मानित नेता झलनाथ खनाल सातौंपटक इलामको १ नम्बर निर्वाचन क्षेत्रबाट प्रतिनिधिसभा सदस्यको लागि चुनावी प्रतिस्पर्धामा छन् ।

विक्रम संवत् २०५६ सालको निर्वाचनमा नेपाली कांग्रेसका बेनुपराज प्रसाईंसँग पराजित भएबाहेक २०४८ यताका संसदीय निर्वाचनमा खनालले हार व्यहोर्नुपरेको छैन ।

गत आमचुनावमा नेकपा एमालेका तत्कालीन नेता खनालले कांग्रेसका भूपेन्द्र कट्टेललाई पराजित गरेका थिए ।

यसपटक कांग्रेस सहितको सत्ता गठबन्धनबाट साझा उम्मेदवार खनालको मुख्य प्रतिस्पर्धी २ कार्यकाल इलाम नगरपालिकाको प्रमुख बनेका एमालेका जिल्ला अध्यक्ष महेश बस्नेत छन् । लामो समय कांग्रेसको राजनीतिमा सक्रिय विक्रम पाण्डेले स्वतन्त्र उम्मेदवारी पनि सोही क्षेत्रबाट दिएका छन् ।

इलामको प्रदेशसभा १(१) मा गठबन्धनको तर्फबाट नेकपा एकीकृत समाजवादीकी नेत्री एवं प्रदेश १ सरकारकी पर्यटन तथा संस्कृतिमन्त्री खिनु लङ्वा लिम्बूको उम्मेदवारी रहेको छ भने एमालेले सन्दकपुर गाउँपालिकाकी पूर्व उपाध्यक्ष शोभा पराजुलीलाई उम्मेदवार बनाएको छ । 

प्रदेशसभा १(२) मा गठबन्धनबाट कांग्रेसका नेता एवं रोङ गाउँपालिकाका पूर्व अध्यक्ष शमशेर राईका विरुद्ध एमालेले माई नगरपालिकाका पूर्व प्रमुख दीपककुमार थेबेलाई अघि सारेको छ ।

उम्मेदवारहरू आ–आफ्नो एजेण्डा, पार्टीको घोषणा र प्रतिबद्धतापत्र लिएर जनताको घरदैलोमा व्यस्त छन् । भेला तथा चुनावी सभाले निर्वाचनको माहौल तताएको छ । नेता खनाल सडकदेखि पर्यटनसम्मका १७ योजनासहित अहिलेसम्म भएका कामको फेहरिस्त लिएर चुनाव प्रचारमा व्यस्त छन् ।