लोकतान्त्रिक वाम गठबन्धनका साझा उम्मेदवार नेपाली कांग्रेसका केन्द्रीय सदस्य रमेश लेखकले तेस्रो पटक संघीय संसद् प्रतिनिधिसभा सदस्यमा विजयी भएका छन् । उनी कञ्चनपुर–३ बाट १२ हजार मतान्तरसहित निर्वाचित भएका हुन् ।

नेकपा एमालेकी निरुदेवी पाललाई १२ हजार ७५ मतले पराजित गर्दै लेखक निर्वाचित भएका हुन् । विक्रम संवत् २०२० सालमा बैतडीमा जन्मिएका लेखकले ३० हजार ५२३ मत प्राप्त गरेका हुन् ।

त्यसैगरी पालले १८ हजार ४४८ मत प्राप्त गरिन् । लेखक यसअघि २०५६ र २०७० सालको निर्वाचनमा सोही क्षेत्रबाट निर्वाचित भएका थिए । उनी २०७४ सालको निर्वाचनमा भने नेकपा एमालेका नेता दिपकप्रकाश भट्टसँग पराजित भएका थिए ।

नेता लेखक विक्रम संवत् २०३७ सालमा आईएस्सी पढ्दै गर्दा नेविसंघको तर्फबाट स्ववियू सभापतिमा चुनावमा प्रतिस्पर्धा गरे र पराजित भएका थिए । यसपछि लेखक भारतको लखनउ विश्वविद्यालय पुगेका थिए । उनले भारतबाट बीए, एमए र एलएलबी (कानून) को अध्ययन पूरा गरे ।

विक्रम संवत् २०४८ सालमा नेता लेखक नेपाली कांग्रेस कञ्चनपुरको जिल्ला सचिव हुँदै २०४८ देखि २०५६ सालसम्म कांग्रेस कञ्चनपुरको २ कार्यकाल सचिव भएका थिए ।

विक्रम संवत् २०६२ सालको संसद् स्थापनापछि नेता लेखकले शुरूमा श्रमराज्यमन्त्री र त्यसपछि श्रममन्त्री बनेका थिए । तत्कालीन माओवादीसँग विस्तृत शान्ति सम्झौता गर्न पनि नेता लेखकले सदस्यको हैसियतबाट महत्त्वपूर्ण कार्य गरेका थिए । त्यसपछि नेता लेखक २०६४ सालको आम निर्वाचनमा प्रत्यक्ष नभई पार्टीबाट समानुपातिकमा निर्वाचन लडेका थिए ।

विक्रम संवत् २०७० सालमा चुनाव जितेपछि नेता लेखक भौतिक पूर्वाधार तथा योजना मन्त्री बनेका थिए । त्यस समयमा नेता लेखकले महाकाली नदीमा ४ लेनको पक्की पुल, नेपाल, भारत र चीन जोड्ने महाकाली करिडोरका लागि महत्त्वपूर्ण भूमिका निर्वाह गरेका थिए ।