नेकपा एमालेका पोलिटब्यूरो सदस्य सूर्य थापाले वामपन्थी सरकारको नाममा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई प्रधानमन्त्री स्वीकार गर्न नसकिने बताएका छन् । 

मुलुकमा अब वामपन्थीको नाममा मुरलीको धुन नबज्ने बताउँदै थापाले च्याखे थाप्ने प्रचण्डलाई अब अगाडि नसार्ने स्पष्ट पारे ।

बुटवलमा बिहीवार पत्रकारसँग कुराकानी गर्दै प्यूठानबाट नवनिर्वाचित प्रतिनिधिसभा सदस्य समेत रहेका थापाले भने, ‘वामपन्थी मिलून् र फेरि गाईजात्रा गरून् भन्ने पक्षमा जनता छैनन् । वामन्थी एकताबाट धोका पायौं । प्रचण्ड विश्वसनीयताको ठूलो संकटमा छन् ।’

जनतामा एमाले र कांग्रेस मिलेर स्थायित्व दिने गरी सरकार बनोस् भन्ने चाहना रहेको बताउँदै थापाले सरकार बनाउने ‘रेस’बाट एमाले पछि हटिनसकेको स्पष्ट पारे । ‘सरकार बनाउने र गिराउने अहिलेको खेलबाट हाम्रो पार्टी टाढा रहेर प्रतिपक्षमा बस्न तयार छ । देशलाई स्थिरता दिएर आलोपालो सरकार चलाए देशलाई निकाश दिन आवश्यक छ,’ थापाले भने, ‘त्यसका लागि कांग्रेसमा निर्वाचित भएर आएका युवा नेताहरू गम्भीर बन्नुपर्छ ।’