प्रतिनिधिसभाका नवनिर्वाचित सदस्यहरूलाई राष्ट्रिय प्रजातन्त्र पार्टीका नेता पशुपतिशमशेर जबराले सपथ ग्रहण गराउने भएका छन् । संघीय संसद् सचिवालयका प्रवक्ता रोजनाथ पाण्डेले ऐन, कानून र संवैधानिक व्यवस्थाअनुसार नेता जबराले प्रतिनिधिसभाको ज्येष्ठ सदस्यको हैसियतले नव निर्वाचित सांसदहरूलाई सपथ ग्रहण गराउने कार्यक्रम तय गरिएको बताए । 

पुस ७ गते बिहीवार अपरान्ह १ बजे नयाँ बानेश्वरस्थित संघीय संसद् भवनमा सपथग्रहण कार्यक्रम तय गरिएको छ । प्रवक्ता पाण्डेका अनुसार राष्ट्रपति विद्यादेवी भण्डारीले ज्येष्ठ सदस्य जबरालाई सपथ ग्रहण गराएपछि मात्रै उनले अन्य सांसदहरुलाई सपथ गराउनुपर्ने हुन्छ । त्यसका लागि पुस ६ गते बुधवारको कार्यक्रम तय गरिएको पनि प्रवक्ता पाण्डेले जानकारी दिए । 

‘हामीले उपलब्ध भएकाहरूको प्रमाणको आधारमा चाँहि राप्रपाका नेता जेष्ठ हुनुहुन्छ माननीय पशुपति शमशेर जबरा । उहाँमार्फत उहाँहरूलाई शपथग्रहण गराउने कार्यक्रम अगाडि बढाइसकेका छौँ । उहाँको उमेर चाहिँ जन्म मिति १९९८ मंसिर २४ गतेको छ । त्यो डेट चाहिँ हामीले नागरिकताको आधारमा पहिचान गरेका हौँ । त्यो हिसाबले उहाँ ज्येष्ठ सदस्य देखिनु भएको छ’, प्रवक्ता पाण्डेले भने, ‘उहाँबाहेक विगतमा नागरिकताको प्रमाणको आधारमा हेर्दाखेरी  मतदाताको विवरण हेर्दाखेरी माननीय महिन्द्रराय यादवको रहेको तर उहाँ अघिल्लो पटक पनि शपथग्रहण गराउने बेलामा उपस्थित नहुनु भएकाले उहाँ उपस्थित हुने अवस्था नदेखिँदाखेरी अहिले चाहिँ माननीय पशुपतिशमशेर जबराले सपथ गराउने गरी हामीले कार्यक्रम तय गरेका छौँ ।’

सर्लाही क्षेत्र नम्बर २ बाट निर्वाचित नेपाल समाजवादी पार्टीका अध्यक्ष महिन्द्रराय यादव नागरिकतामा ८५ वर्ष पुगेको भए पनि नागरिकतामा आफ्नो जन्ममितिमा त्रुटि भएको उल्लेख गर्दै २०७४ सालमा पनि नवनिर्वाचित सांसदहरुलाई सपथ ग्रहण गराउने कार्यक्रममा अनुपस्थित भएका थिए । उनले अहिले पनि नआउने बताएकाले जबराबाट नै ज्येष्ठ सदस्यको रुपमा सपथ ग्रहण गराउने कार्यक्रम तय गरिएको पनि संघीय संसद् सचिवालयले स्पष्ट पारेको छ । 

संसद् सचिवालयले मातृभाषामा सपथ लिने व्यवस्था पनि गरेको छ । मातृ भाषामा सपथ लिन चाहने सांसदहरुलाई सपथ ग्रहणको ढाँचा विवरण अनुसार त्यसलाई मातृभाषामा उल्था गर्न पत्राचार गरिएको छ । सपथ ग्रहण गराउनु ३ दिन अघि नै सो उल्था गरिएको सपथग्रहणको कपी संंसद सचिवालयमा सांसदहरूले पेश गर्नुपर्ने हुन्छ । प्रवक्ता पाण्डेले अहिले मातृभाषामा शपथ लिन चाहने  सांसदहरुको विवरण संकलनको काम भइरहेको बताए । 

गत मंसिर ४ गते सम्पन्न निर्वाचनबाट प्रतिनिधिसभामा प्रत्यक्षतर्फ १६५ जना र समानुपातिकतर्फ ११० जना गरी २७५ जना सांसदहरू निर्वाचित भएका छन् । उनीहरूलाई सपथ ग्रहण गराएपछि मात्रै संसदीय गतिविधि अघि बढाउनुपर्ने व्यवस्था रहेको पनि संघीय संसद सचिवालयले जनाएको छ ।