नेपाली कांग्रेसका उपसभापति पूर्णबहादुर खड्काले सभापति शेरबहादुर देउवाले भारी मतका साथ संसदीय दलको नेतामा चुनाव जित्ने दाबी गरेका छन् । कांग्रेस संसदीय दलको चुनाव बुधवार बिहानका लागि तोकिएको छ । देउवाको उम्मेदवारीमा खड्का समर्थक रहेका छन् । 

संविधानको रक्षा र राजनीतिक स्थायित्वका लागि शेरबहादुर देउवालाई प्रधानमन्त्री बनाउनुपर्ने भएकाले उनलाई संसदीय दलको नेतामा समर्थन गरेको खड्काले बताए । 

‘मुलुकलाई स्थायी शान्तिमा लैजानको लागि, १२ बुँदे शान्ति सम्झौतालाई पूर्णता दिएर आर्थिक उन्नति, प्रगतिको आधारमा देश विकास गर्नको लागि लागि शेरबहादुर देउवालाई प्रधानमन्त्री बनाउन आवश्यक छ’, खड्काले भने, ‘अनुभव, सबैलाई मिलाएर लैजान सक्ने र विश्वासको पहुँच उहाँमा छ ।’ 

महामन्त्री गगन थापाले रुपान्तरण र पुस्तान्तरणको एजेण्डासहित संसदीय दलको नेतामा उम्मेदवारी दर्ता गरेको बारे खड्काले भने, ‘समयक्रमा पुस्तान्तरण हुँदै जान्छ । शेरबहादुर देउवा र रामचन्द्र पौडेलसहितको विश्वासको आधारमा पुस्तान्तरण हुँदै जान्छ । त्यसको लागि समय आउँछ ।’