प्रतिनिधिसभाका नवनिर्वाचित सांसदहरुले आज पद तथा गोपनीयताको शपथ लिएका छन् । 

नयाँ बानेश्वरस्थित संसद भवनमा जेष्ठ सदस्य पशुपति शम्शेर जबराले नवनिर्वाचित सांसदहरूलाई शपथ गराएका हुन् । 

मंसिर ४ मा प्रतिनिधिसभा तथा प्रदेश सभाको निर्वाचन भएको थियो । २०७२ मा नयाँ संविधान जारी भएपछिको यो दोस्रो पटक निर्वाचित भएर आएको प्रतिनिधिसभा हो ।

२०७४ को मंसिरमा संविधानपछिको पहिलो प्रतिनिधिसभाको निर्वाचन भएको थियो । 

प्रतिनिधि सभा सदस्यको सपथ ग्रहणमा सांसदहरूले राष्ट्रिय र सांस्कृतिक पोसाक लगाएर सहभागी भएका थिए । 

प्रतिनिधि सभाको कुल २७५ सांसदहरूमध्ये २७१ सांसदले बिहीबार सपथ लिएका छन् । 

माओवादी केन्द्रका रामकुमार राई, महिन्द्र राय यादव, नेकपा एकीकृत समाजवादीका प्रेम आले र नेपाली कांग्रेसकी माया राईले भने सांसदको सपथ लिएका छैनन् । 

आले मातृशोकमा छन् भने कांग्रेसकी राई केही दिनअघि सुत्केरी भएका कारण सांसदको सपथ ग्रहणमा सहभागी हुन सकिनन् । उनी कांग्रेसबाट समानुपातिक सांसद हुन् । 

१४ जना सांसदले भने मातृभाषामा शपथ लिएका छन् । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले थप शपथ पत्रमा हस्ताक्षर गरेर संसद सचिवालयमा रेकर्डका लागि बुझाएका छन् । थप शपथमा उनले ‘भ्रष्टाचार गर्नु आमाको रगत खानु बराबर हो’ भन्ने ब्यहोरा उल्लेख गरेका छन् । 

शपथ ग्रहण समारोहपछि नवनिर्वाचित सांसदहरुको सम्मानमा संसद सचिवालयले चियापान कार्यक्रम आयोजना गरेको थियो । 

नयाँ बानेश्वरस्थित संसद भवन परिसरमै आयोजित चियापान कार्यक्रमको मेन्यूमा भने भेज कटलेट, स्वीट कर्न, बर्फी, फ्रेन्च फ्राइ, सुन्तला लगायतका खानेकुरा समावेश गरिएको थियो । 

चियापानसँगै कतिपय सांसदहरु भने फोटो सुट गरिरहेका देखिन्थे । कपितय चाहिँ नयाँ सांसदहरुसँग चिनजानका लागि परिचय गरिरहेको पनि देखिन्थ्यो । 

सरकारको सिफारिसमा राष्ट्रपति विद्या भण्डारीले संसद अधिवेशन आह्वान गरेपछि मात्रै संसदको पहिलो बैठक बस्छ । पहिलो बैठकपछि भने औपचारिकरुपमा सांसदहरुको ५ वर्षे कार्यकाल शुरू हुन्छ ।