नेकपा एकीकृत समाजवादीका नेता एवं पूर्वप्रधानमन्त्री झलनाथ खनालले गृहमन्त्री रवि लामिछानेप्रति गम्भीर सवाल उठाएका छन् । पार्टीको पोलिटब्यूरो बैठकमा प्रस्तुत गरेको दस्तावेजमा खनालले गृहमन्त्रालयजस्तो संवेदनशील ठाउँ नागरिकताबारे मुद्दा खेपिरहेका व्यक्तिलाई सुम्पिएको भन्दै उनले गम्भीर सवाल उठाएका हुन् । 

अहिलेको सरकारप्रति पार्टीको दृष्टिकोण कस्तो हुनुपर्छ भन्ने खण्डमा खनालले भनेका छन्, ‘यो सरकारले गृह मन्त्रालयजस्तो सुरक्षाको निम्ति अत्यन्तै संवेदनशील मन्त्रालय सर्वोच्च अदालतमा नागरिकता बारेमा नै मुद्दा खेपिरहेका व्यक्तिलाई सुम्पिएको छ । त्यसले के परिणाम ल्याउने हो ? हेर्न बाँकी नै छ ।’ 

गृहमन्त्री लामिछानेको सांसदमा योग्यताबारे २२ पुसमा सर्वोच्च अदालतको संवैधानिक इजलासमा सुनुवाइ हुँदैछ । निस्क्रिय भएको नेपाली नागरिकताको आधारमा लामिछाने राष्ट्रिय स्वतन्त्र पार्टीबाट सांसदको उम्मेदवार बनेको भन्दै उनको सभापति र सांसद पद खारेजी गर्न सर्वोच्चमा रिट दायर भएको थियो । 

सरकारलाई खिचडीको संज्ञा

​खनालले आफ्नो दस्तावेजमा अहिलेको सरकारलाई खिचडीको संज्ञा पनि दिएका छन् । कांग्रेसले माओवादीलाई धोका दिँदा माओवादी दौडिएर बालकोट पुगेर अहिलेको समीकरण बन्न पुगेको खनालको मत छ । यो सरकारका सहभागी दलको स्वरुपले यसलाई खिचडी बनाएको उनको भनाइ छ । 

राजतन्त्रवादीहरू, हिन्दू राज्यको माग गर्नेहरू, मधेश देश बनाउन माग गर्नेहरू, संघीयता खारेज हुनुपर्छ भन्नेहरू, नेपालको नागरिकतबारे प्रश्न उठेका, जबज लक्ष्य हो भन्नेहरू, समाजवादलाई लक्ष्य मान्नेहरू एकै ठाउँमा भएकोले यसलाई उनले खिचडी सरकारको संज्ञा दिएका हुन् । उनीहरूका साझा नीति र कार्यक्रमहरू, वाम एकताको लागि अपनाउने नीतिलाई हेरेर एकीकृत समाजवादी अघि बढ्नुपर्ने पनि उनले प्रष्ट्याएका छन् । 

नयाँ सरकार गठन भए पनि जनतामा उत्साह नदेखिएको उनको मत छ । 

बन्न सक्थ्यो वामपन्थी सरकार

मेहनत गर्ने र दूरदर्शिता अपनाउन सकिएको भए वामपन्थी सरकार गठन गर्न सकिने अवस्था रहेको पनि उनको दस्तावेजमा उल्लेख छ । ‘मेहनत  गरेको भए, दूरदर्शिता अपनाएको भए, लचिलो भएको भए, एक अर्कालाई सम्मान गर्न सिकेको भए र आफ्ना गल्तीहरूलाई देख्न कोसिस गरेको भए र वाम शक्तिहरूबीच कार्यगत एकता गरौँ भन्ने भावना भएको भए यतिबेला मुलुकमा वामपन्थीहरूको साझा सरकार बन्ने थियो’, खनालले भनेका छन् । 

तर, दलहरूको दम्भ, घमण्ड र महत्वकांक्षाले देशमा खिचडी सरकार बनेको उनको मत छ । भिन्नताहरूलाई एकातिर राखेर साझा सवालमा वामपन्थीबीच कार्यगत एकता गर्नुपर्ने आजको आवश्यकता भएको मत खनालले अगाडि सारेका छन् । 

एकीकृत कम्युनिष्ट पार्टीको निर्माणको आवश्यकतामा जोड दिए पनि खनालले हात मिलाएर वा अंकमाल गरेर मात्रै एकता नहुने बताएका छन् । नीति, सिद्धान्त र विधिसम्मत एकताको पक्षमा आफू रहेको पनि खनालले प्रष्ट्याएका छन् ।