मलेसियामा बन्धक बनाइएका १३ नेपाली कामदारको उद्धार भएको छ । उद्धार भएकामध्ये ६ जना भोलि (मंगलबार) स्वदेश फर्किने भएका छन् ।

नेपालबाट मलेसिया गएका नेपाली समस्यामा परेको गुनासो प्राप्त भएपछि सोमबार बिहान प्रधानमन्त्री पुष्पकमल दाहाल ‘प्रचण्ड’ले उनीहरूलाई रिहा गर्न मुख्यसचिव शंकरदास बैरागीलाई निर्देशन दिएका थिए। 

सरकारले परराष्ट्र मन्त्रालयमार्फत मलेसियास्थित नेपाली दूतावाससँग सम्पर्क गरी बन्धक बनाइएका नेपालीको अवस्था बुझेर तत्काल उद्धारका लागि पहल गरेको थियो। जसअनुसार मलेसियाको पीआरएस फोरेस्ट म्यानेजमेन्ट कम्पनीमा कार्यरत १३ नेपाली स्वदेश फर्किने भएका हुन्। 

मलेसियास्थित नेपाली दूतावासले प्रधानमन्त्री कार्यालयलाई दिएको जानकारीअनुसार हाल उक्त कम्पनीमा काम गर्न गएका सबै (१३ जना) श्रमिकहरुलाई म्यानपावर कम्पनीले खर्च बेहोर्ने गरी एक नेपाली होटलमा खाने र बस्ने व्यवस्था गरिएको छ । दूतावासको पहलमा उनीहरूमध्ये ६ जना भोलि, १० जनवरीमा ६ जना र १३ जनवरीमा ७ जना फर्कने भएका छन् ।

यसैगरी मलेसियाका एक अन्य कम्पनीमा समस्यामा परेका २८ जना नेपाली श्रमिकहरूको समस्या हल गर्न समेत पहल भइरहेको छ ।