नवनियुक्त परराष्ट्रमन्त्री डा. विमला राई पौड्यालले परराष्ट्र मन्त्रालयले जनतालाई दिने सेवा सहज बनाउनु आफ्ना पहिलो प्राथमिकता हुने बताएकी छन् ।

विदेशमा रहेका नेपाली दूतावासलाई नेपालीले घरजस्तै महसूस गर्ने वातावरण बनाउनु आफ्नो अर्को प्राथमिकता भएको उनले बताइन् । 

मंगलवार सिंहदरबारमा परराष्ट्र मन्त्रीको कार्यभार सम्हाल्ने क्रममा मन्त्री राईले पासपोर्ट लगायत जनताले पाउने सेवालाई सहज बनाउने आफ्नो प्राथमिकता रहेको बताइन् ।

‘परराष्ट्र मन्त्रायलले नेपालमा पुर्‍याउने सेवालाई कसरी सहज बनाउने भन्ने मेरो प्राथमिकता हुनेछ । दोस्रोमा नेपालस्थित कूटनीतिक नियोगलाई समन्वय गरेर नेपाललाई धेरै फाइदा पुर्‍याउने कुरातर्फ ध्यान दिन्छु,’ मन्त्री राईले भनिन् । 

आफूसँग कूटनीतिक नियोगमा काम गरेको अनुभवका आधारमा विदेशमा रहेका दूतावासलाई नेपालीले घर महसूस गर्ने गरी काम गर्ने योजना रहेको उनले सुनाइन् । ‘कूटनीतिक नियोगमा काम गर्दा १ जना राजदूतले आफ्नो दूतावासमा आउने व्यक्तिले घर फिल गर्नुपर्छ भन्नुभएको थियो । विदेशमा रहेका नेपाली दूतावासमा पुग्दा घर आएको महसूस गर्ने गरी काम गर्छु,’ राईले भनिन् ।