भारतका कन्नड लेखक केएस भगवानले मर्यादा पुरुषोत्तम रामका विषयमा आपत्तिजनक टिप्पणी गरेका छन् । 

वाल्मीकिको रामायणमा रामले सीतासँग बसेर अपराह्नमा मदिरा पिउने गरेको उनको भनाइ छ । 

शुक्रवार मान्ड्यामा एउटा समारोहलाई सम्बोधन गर्दै भगवान राम आदर्श पुरुष नभएको र उनले पत्नी सीतालाई जंगल पठाएर बेवास्ता गरेको बताए । अनि एउटा रुखमुनि तपस्या गरिरहेका शूद्रको टाउको पनि रामले काटेको भगवानले बताए । 

‘रामराज्य बनाउने कुरा गरिन्छ । तर वाल्मीकि रामायणको उत्तरकाण्ड पढ्ने हो भने राम आदर्श पुरुष थिएनन् भनी थाहा पाइन्छ । उनले ११ हजार वर्ष नभई जम्मा ११ वर्ष शासन गरेका थिए,’ भगवानले बताए । 

भगवानले यसअघि पनि पटकपटक विवादास्पद टिप्पणी गर्ने गरेका थिए । सन् २०१९ मा पनि उनले रामले लागूपदार्थ बनाएर आफू पनि खाने गरेको अनि सीतालाई पनि खान लगाउने गरेको बताएका थिए । 

उनका यिनै विवादित कुराका कारण दक्षिणपन्थी समूहहरूले उनलाई ज्यान मार्ने धम्की दिने गरेका छन् ।