आइएमस सर्भिसेजले त्रिभुवन अन्तर्राष्ट्रिय विमानस्थलमा यात्रुका लागि थप सहज र सुरक्षित बनाउन एयरपोर्ट सर्भिसेजमा नयाँ आगमन कक्ष बनाउने भएको छ।

नेपाली तथा विदेशी यात्रुहरूका लागि अन्तर्राष्ट्रियस्तरको सुविधा र पर्याप्त (स्पेसियस) पार्किङ गर्ने स्थानको व्यवस्थापनसहितको कक्ष रहेको आइएमसले जनाएको छ।

विमानस्थलको आगमन कक्षबाट यात्रुहरू बाहिर निस्किने मार्गमा एलिभेटरमा बढी भीडभाड हुन थालेपछि आईएमएसले ट्राभलेटर दोस्रो चरणमा निर्माण गरेको थियो ।

नेपाल सरकारको टेन्डर आह्वानपछि निर्माण, व्यवस्थापन, सन्चालन र हस्तान्तरण (बुट) मोडलअनुसार ३० वर्षे लिजसहित आईएमएस एयरपोर्ट सर्भिसेज प्रालिको पूर्ण लगानीमा नेपालकै सबैभन्दा ठूला निर्माण कम्पनीमध्येको एक रसुवा कन्स्ट्रक्सनसँगको साझेदारीमा यो निर्माण भएको हो।

यात्रुहरूले आगमन कक्षबाट बाहिर निस्कँदा प्रयोग गर्ने ट्रलीहरूको व्यवस्थापन यो निर्माणका लागि भएको सम्झौताअन्तर्गत नपरे पनि आईएमएस एयरपोर्ट सर्भिसेजले ट्राभलेटरमा सुरक्षित रुपमा प्रयोग गर्न मिल्ने ह्विल लकिङ सिस्टम भएका नयाँ ट्रलीहरू खरिद गरेर उपलब्ध गराउँदै त्यसको व्यवस्थापनमा पनि सहजीकरण गरेको थियो ।

तर, ह्विल लकिङ सिस्टम नभएका त्रिभुवन अन्तर्राष्ट्रिय विमानस्थलमा पहिलेदेखि नै प्रयोगमा रहेका ट्रलीहरू प्रस्थान कक्षबाट आगमन कक्षमा पुगेर नयाँ ट्रलीहरूसँग मिसमास भइरहेपछि ट्राभलेटरमा ती पुराना ट्रलीहरूका कारण एकभन्दा धेरै लगेज भएका यात्रुहरूका लागि समस्या भएको थियो ।