नेपाली कांग्रेसका उपसभापति धनराज गुरुङले जनताले सिटामोल नपाएको अवस्थामा दलका पहुँचवाला नेताले उपचार खर्च लिनु भ्रष्ट चरित्र भएको बताएका छन् ।

राजनीतिक दलका नेताको भ्रष्ट चरित्रका कारण जनताले दुख पाइरहेको उनले टिप्पणी गरे ।

आइतबार प्रतिनिधि सभा बैठकको विशेष समयमा उपसभापति गुरुङले जनता चौतर्फी समस्यामा रहँदा पनि राजनीतिक दलका नेताहरूले आफूलाई सुधार्न तयार नभएको बताएका हुन् ।

‘गरिब नेपालीले ज्वरो आउँदा एक ट्याबलेट सिटामोल नपाउने अवस्था छ, उपचार खर्च अभावमा अस्पतालको गेटबाट बाहिर जानुपर्ने अवस्था छ । उपचार खर्च लिनु पर्‍यो भने पालिको सिफारिस स्लाउन भन्छ, तैपनि त्यो फाइलको कहिल्यै निर्णय हुँदैन’, गुरुङले भने, ‘तर नेता बिरामी हुँदा, नेतालाई उपचार खर्च गर्दा पालिकाको सिफारिस ल्याउनु पर्दैन, गरिबले तिरेका करको ढुकुटीबाट उपचार खर्च लिने गरेका छन् ।'

उपचार खर्चका नाममा जनताको करबाट खर्च लिनु भ्रष्ट प्रवृत्ति भएको उनले बताए। यही भ्रष्ट प्रवृत्तिकका कारण जनताले दुःख पाएका उनको भनाइ थियो।