नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले राज्यका सबै निकायले नीति, नियम तथा कानूनहरू बनाउँदा सम्बन्धित सरोकारवाला पक्षहरूसँग छलफल गरेर बनाए मात्र उद्देश्य र नतिजा प्राप्त हुने बताएका छन्। 

शुक्रबार धुलिखेल उद्योग वाणिज्य संघका नवनिर्वाचित पदाधिकारीहरूको पदस्थापना तथा शपथ ग्रहण कार्यक्रममा प्रमुख अतिथिको रुपमा सम्बोधन गर्दै महासंघका कार्यवाहक अध्यक्षसमेत रहेका ढकालले त्यसरी छलफल नै नगरी नीति नियम बनाउँदा कार्यान्वयनमा कठिनाइ हुने बताए। 

साथै खोजेको उद्देश्य पनि प्राप्त हुन नसकेको उनको भनाइ थियो। 

राज्यले निजी क्षेत्रसँग सहकार्य गरेर अगाडि बढ्दा मुलुकले चाहेको आर्थिक विकास पनि हासिल गर्न सहज हुने उनले बताए। 

कोभिडका कारण वैदेशिक रोजगारीमा गएका श्रमिकहरू घर फर्किने तर जाने क्रम रोकिएको, पर्यटकहरू आउने बन्द भएको तथा मूल्य वृद्धि भई आयातमा धेरै पैसा बाहिरिएका कारण अर्थतन्त्रमा समस्या आएको उनले प्रस्ट पारे। 

तर कोभिड महामारीको समयदेखि शुरू तरलताको समस्या विस्तारै सहज हुँदै गएको उनको भनाइ थियो। 

'कोभिडको समयमा उद्योग व्यवसाय बन्द भए । विदेशबाट रेमिट्यान्स भित्रिने क्रम पनि कम भयो । आयातमा धेरै पैसा बाहिरियो र यसले गर्दा बैंकमा लगानीयोग्य पुँजीको अभाव भयो । तर अहिले विस्तारै सबै सकारात्मक हुँदै छन् । यसले के भन्न सकिन्छ भने अबको केही समयभित्र अर्थतन्त्र सहज बाटोबाट अगाडि बढ्छ,' उनले भने। 

महासंघको तर्फबाट आफूहरूले गरेको निरन्तर पहलस्वरुप नियामक निकाय र अन्य सरोकारवालसम्म कुरा पुगेको र केही कुराहरू सम्बोधन गरेको उनले बताए। 

'हामीले प्रधानमन्त्री, उपप्रधान मन्त्री तथा अर्थ मन्त्री र नेपाल राष्ट्र बैंकको गर्भनरज्युलगायतलाई बारम्बार हाम्रा समस्याहरू राखेर यसमा सम्बोधन गर्न भनेका छौँ । केही कुरा सम्बोधन पनि भएका छन् । अझै धेरै बाँकी छन् । यसमा हामी निरन्तर पैरवी गर्ने नै छौँ,' उनले भने।