सर्वोच्च अदालतले क्रिकेटर सन्दीप लामिछानेलाई क्रिकेट खेल्न विदेश जाने अनुमति दिएको छ ।

नाबालिग बलात्कार मुद्दामा जिल्ला अदालत काठमाडौंले सन्दीपलाई पुर्पक्षका लागि थुनामा पठाएको थियो ।

तर उच्च अदालत पाटनले धरौटीमा छाड्न आदेश दिएको थियो । तर यसविरुद्ध सरकारी वकिलहरू सर्वोच्च अदालत पुगेका थिए । क्रिकेट खेल्न विदेश जान नपाउने आदेशविरुद्ध सन्दीपले सर्वोच्चमा दिएको निवेदनपछि सोमबार सर्वोच्चले उनलाई विदेशमा खेल्न अनुमति दिएको हो । 

अनुमति पाएसँगै सन्दीपले यूएईमा जारी क्रिकेट विश्वकप लिग २ का ३ वटा खेल खेल्न पाउने भएका छन् ।

सोमबार पपुवा न्युगिनीविरुद्ध नेपालले खेलिरहेको छ । तर लिगको सिरिजमा १८ फागुनमा (मार्च २) यूएईविरुद्ध १९ फागुनमा पपुवा न्युगिनी (पीएनजी) विरुद्ध र २२ फागुनमा यूएईविरुद्ध गरी ३ वटा खेल खेल्न पाउने भएका छन् । समयमै यूएई पुगे उनले ३ वटा म्याच खेल्न पाउँछन्। 

यसअघि नेपालमै भएको यही लिगअन्तर्गत त्रिदेशीय सिरिजमा नेपालले स्कटल्यान्ड र नामिबियाविरुद्धका ४ वटै खेल जितेको थियो ।

४ वटै खेलमा सन्दीपले १३ विकेट लिएका थिए ।  

तर खेल सकिएको १५ दिनभित्र उपस्थित हुन पनि सर्वोच्चले भनेको छ।