नेकपा (माओवादी केन्द्र) का उपाध्यक्ष अग्नि सापकोटाले संक्रमणकालीन न्यायसँग सम्बन्धित विषयहरू विस्तृत शान्ति सम्झौताको मर्म र भावनाअनुसार बढाउनुपर्ने बताएका छन्। 

शनिबार जनकपुरमा सञ्चारकर्मीसँग कुराकानी गर्दै पूर्वसभामुख सापकोटाले विस्तृत शान्ति सम्झौतामा सत्य निरुपण तथा मेलमिलाप आयोग गठन गरेर शान्ति प्रक्रियाका काम टुंग्याउने भनिएको उल्लेख गरे। यो पनि सोहीअनुरूप हुनुपर्ने उनले जिकिर गरे।

द्वन्द्वकालका घटनाहरूको मुद्दा सर्वोच्च अदालतमा दर्ता हुनु विस्तृत शान्ति सम्झौताविपरीत भएको उनको भनाइ छ। 

उनले देशमा प्राप्त भएका राजनीतिक उपलब्धिहरूलाई उल्ट्याउने कोशिस भएमा नेपाली जनताले त्यसको प्रतिरोध गर्ने बताए।

उनले विस्तृत शान्ति सम्झौताको गम्भीरता र राष्ट्रमा त्यसले पार्ने प्रभावबारे चिन्तन गर्दै त्यसै अनुसार समाधान गर्नुपर्नेमा जोड दिए।