भरतपुर महानगरपालिकाभित्र विकास निर्माणको जिम्मा लिएर समयमा काम नसक्ने १४ ठेकेदार कम्पनीलाई कारबाहीका लागि तयारी भएको छ। 

महानगरभित्रका विभिन्न निर्माणको जिम्मा लिएर काम शुरू नगर्ने, अलपत्र छाड्ने र काममा ढिलासुस्ती गर्ने कम्पनीलाई कारबाही थालिएको महानगरपालिकाका इन्जिनियर सन्तोष आचार्यले जानकारी दिए। 

उनका अनुसार महानगरले यस वर्ष २ निर्माण कम्पनीलाई कारबाही गर्न सिफारिस गर्नुका साथै थप १४ कम्पनीलाई कारबाहीका लागि कार्यपालिका बैठकले निर्णय भइसकेको छ ।

सिफारिसमा परेका २ कम्पनी कारबाहीमा परिसकेका इन्जिनियर आचार्यले बताए।

उनले भने, 'कार्यपालिका बैठकले कारबाहीका लागि सिफारिस गर्ने निर्णय गरिसकेकाले कारबाहीको प्रक्रिया अघि बढेको छ ।'

कारबाही गरिएकामा काठमाडौँस्थित अनुष्ठा कन्स्ट्रक्सन प्रालि र भरतपुरस्थित जनकन्स्ट्रक्सन रहेका छन् ।

ती कम्पनीलाई कामको प्रकृति हेरी १ देखि तीन वर्षसम्म कालोसूचीमा राखिने उनको भनाइ थियो । कालोसूचीमा परेका कम्पनीले १ देखि ३ वर्षसम्म विकास निर्माणका लागि नयाँ ठेक्का सम्झौता गर्न नपाउने, बाँकी कामको समेत चलनचल्तीको मूल्यमा असुलउपर गराउने इन्जिनियर आचार्यले जानकारी दिए।

महानगर उपप्रमुख चित्रसेन अधिकारीले ठेक्का सम्झौता गरी काममा ढिलासुस्ती गर्ने ठेकेदार कम्पनीलाई कारबाहीको प्रक्रिया शुरू गरिएको बताए। उनले भने, 'समयमा काम नगर्नेलाई कारबाही र समयमा काम सम्पन्न गर्नेलाई सम्मान गर्नेछौँ ।'

ठेकेदार कम्पनीलाई कुनै पनि बहानामा काममा ढिलासुस्ती गर्न छुट नभएको उनको भनाइ थियो ।