विराट गोल्डकप फूटबल प्रतियोगितामा शुक्रवार विभागीय टीम त्रिभुवन आर्मी र जावलाखेल युथ क्लब खेल्दैछन् । साँझ ६ बजेदेखि विराटनगरको शहीद मैदानमा खेल हुँदैछ ।

विराट गोल्ड कप फूटबल ट्रस्टको आयोजनामा सञ्चालित प्रतियोगिताको सातौं संस्करणमा पहिलोपटक जावालाखेल  मैदानमा उत्रिन लागेको हो ।

ए डिभिजन लिग खेल्दै आएको जावलाखेललाई पहिलोपटक मोफसलको सर्वाधिक पुरस्कार राशिको प्रतियोगिता विराट गोल्ड कप खेल्ने अवसर मिलेको हो । आर्मी पाँचौं संस्करणको विराट गोल्डकपको उपविजेता टीम हो । २०७४ सालमा भएको गोल्डकपमा आर्मी थ्रीस्टारसँग फाइनलमा ३–० गोलले पराजित भएको थियो । 

दुवै टोलीसँग ए डिभिजनमा उत्कृष्ट प्रदर्शन गरेका खेलाडीहरू भएका कारण खेल रोचक हुने अनुमान गरिएको छ । 

चैत १६ गतेसम्म सञ्चालन हुने प्रतियोगितामा स्वदेशी र विदेशीसहित ८ टीमको सहभागिता रहेको छ । प्रतियोगिताको विजेता हुने टीमले २० लाख १५ हजार र उपविजेताले १० लाख १५ हजार रुपैयाँ पुरस्कार पाउने छन् ।