राष्ट्रिय सभा सदस्य डा. विमला राई पौड्यालले मिटरब्याजीहरूलाई संरक्षण नगर्न राजनीतिक दलहरूलाई आग्रह गरेकी छन्। 

बिहीवारको राष्ट्रिय सभा बैठकमा पौड्यालले मिटरब्याजीहरूलाई राजनीतिक दलका कार्यकर्ताले संरक्षण गरिरहेको भनेर पीडितहरूले भनेको बताइन्। 

मिटरब्याजीहरूलाई दलका कार्यकर्ताले संरक्षण गरे, नगरेको विषयमा दलहरू बोल्नुपर्ने उनको भनाइ थियो।

दलहरूले आफ्ना मतदाता र समर्थकबाट मिटरब्याजीको संरक्षण हुन दिनु नहुने उनले ‍बताइन्। 

त्यसैगरी उनले मिटरब्याज पीडितहरूलाई खुलामञ्चमा बस्न नदिइएको भन्दै असन्तुष्टि पनि व्यक्त गरिन्। 

‘खुल्लामञ्चमा बस्न दिइएन उहाँहरूलाई । खुलामञ्च काठमाडौंको मात्रै पेवा रहेछ । मधेशबाट आउने मधेशी महिलाहरूले त्यहाँ खुट्टा टेक्न नपाउने । कार्यदल बनाएको सरकारले भन्नेकुरा हामीले सुनेका छौँ । कार्यदलले के गर्दैछ, यो कुरा एकदमै प्राथमिकतामा राखेर कानून कहाँनिर संशोधन गर्नुपर्छ, कानून संशोधन गर्नुपर्‍यो । मेरो विचारमा मिटरब्याजलाई संविधानले पनि चिन्दैन । अर्थतन्त्रले नि चिन्दैन । कानूनले पनि चिन्दैन । नचिन्ने मिटरब्याजी कहाँबाट आयो ?' उलने प्रश्न गरिन्। 

उनले थपिन्, 'हिजो हामी जाँदा त्यहाँका महिलाहरूले के भन्नुभयो भने नि, उहाँहरू दलका कार्यकर्ता हुन्, दलका नेताहरू हुन्, उहाँहरूले सिडीओ, पुलिसलाई चिन्नुहुन्छ त्यसकारण हामीले न्याय पाउँछौँ ? प्रश्न त्यो हो । दलका कार्यकर्तालाई हामीले संरक्षण गरिरहेका छौँ ? दलहरूले बोल्नुपर्‍यो । सबै राजनीतिक दलहरूलाई चुनौती हो यो । सबै राजनीतिक दलहरूले आफ्ना दलबाट त्यस्ता कामहरू भएका छन् भने, आफूले संरक्षण गरेका आफ्ना भोटरबाट आफ्ना समर्थकबाट भएका छन् भने त्यो हुन दिनुभएन । त्यो काम राजनीतिक दलहरूले गर्नुपर्‍यो ।’ 

डा. पौड्यालले मिटरब्याज गैरकानूनी भएको भन्दै त्यस विषयमा जनचेतना जघाउनुपर्ने बताइन्।