चितवन पुगेका प्रधानमन्त्री पुष्पकमल दाहाल 'प्रचण्ड' कृषि तथा वन विज्ञान विश्वविद्यालयको कार्यक्रममा सहभागी भएका छन्। 

कृषि तथा वन विज्ञान विश्वविद्यालयमा सरिक हुन प्रधानमन्त्री प्रचण्ड बिहानै रामपुर लागेका थिए। 

चितवनको रामपुरमा रहेको विश्वविद्यालयको तेस्रो दीक्षान्त समारोह, विश्वविद्यालय सभाको बैठकमा उनी सहभागी भएका हुन्। 

विश्वविद्यालयले आफ्नो तेस्रो पटक दीक्षान्त समारोह गरेको हो। विश्वविद्यालयले स्नातक तहको शैक्षिक वर्ष २०७२/०७३ देखि हालसम्म र स्नातकोत्तर तहको शैक्षिक वर्ष २०७५/७६ देखि हालसम्मका विद्यार्थीलाई आज (बिहीबार) दीक्षित गर्न लागेको हो ।

विश्वविद्यालयका उपकुलपति प्राडा पुण्यप्रसाद रेग्मीका अनुसार स्नातक, स्नातकोत्तर र विद्यावारिधि तहका गरी एक हजार ८५ विद्यार्थीहरु दीक्षित हुनेछन् । स्नताक तहमा कृषिबाट चार सय ६८, वनबाट एक सय ३६, पशुचिकित्साबाट एक सय पाँच, मत्स्य विज्ञानबाट २३ जना गरी ७३२ जना दीक्षित हुनेछन् । 

स्नातकोत्तर तहमा कृषिबाट एक सय ८९, वन विज्ञानबाट ६१, पशुविज्ञानबाट २७, पशु चिकित्साबाट ४९ र मत्स्य विज्ञानबाट १० गरी तीन सय ३६ र विद्यावारिधिअन्तर्गत कृषि सङ्कायतर्फबाट विभिन्न विधाका गरी १५ र पशुविज्ञान, पशुचिकित्सा तथा मत्स्य विज्ञान सङ्कायमा दुई गरी १७ विद्यार्थी दीक्षित हुने उनले जानकारी दिए ।

दीक्षान्त समारोहमा अध्यक्षता ‘प्रचण्ड’ ले गरेका हुन् भने प्रमुख अतिथि भारतका डा वाईएस पारमर विश्विद्यालयका उपकुलपति प्राडा राजेश्वर सिंह चण्डाल रहेका छन्।