११ बुँदे न्यायिक समिति काठमाडौं घोषणापत्र–२०७९ जारी गर्दै न्यायिक समिति राष्ट्रिय सम्मेलन बिहीबार सम्पन्न भएको छ । काठमाडौं महानगरपालिकाले आयोजना गरेको सम्मेलनले संविधानतः गठित न्यायिक समितिको भुमिकालाई थप प्रभावकारी बनाई सर्वसाधारणको न्यायमा सहज पहुँच बढाउने घोषणा गरेको छ ।

 सम्मेलनमा दुई दिनसम्म भएका छलफलबाट स्थानीय न्याय प्रशासन तथा न्याय सम्पादनका विषयमा वृहत्तर छलफल गरी आफ्नो अधिकार क्षेत्रभित्रको विवाद निरुपण गर्ने उद्देश्यले घोषणा पत्र जारी गरिएको सम्मेलन संयोजक सुनिता डंगोलले बताइन् । 

उनले समतामुलक समाजको निर्माण गर्ने संवैधानिक संकल्पलाई व्यवहारमा उतार्न सबैका लागि न्यायमा सहज पहुँच सुनिश्चित हुनुपर्ने आवश्यकता रहेको बताइन् । 
 काठमाडौं महानगरपालिकाकी उपमेयरसमेत रहेकी डंगोलले नेपालको संविधान, प्रचलित कानुन र न्यायका मान्य सिद्धान्तका आधारमा स्थानीय स्तरमा उत्पन्न हुने विवादको समाधान छिटो, छरितो, सर्वसुलभ, मितव्ययी, निष्पक्ष, प्रभावकारी र जनउत्तरदायी विधि र प्रक्रिया अवलम्वन गरी सबैका लागि न्यायमा सहज पहँुच सुनिश्चित गर्ने घोषणा गरिन् ।

उनले विवादको समाधान सकेसम्म मेलमिलापको माध्यमबाट गर्न वडास्तरीय मेलमिलाप केन्द्र सञ्चालनलाई विशेष जोड दिने बताइन् ।  डंगोलले स्वच्छता, निष्पक्षता, निश्चितता, समानता र समन्याय सहितको अनुमानयोग्य न्यायिक पद्धति आत्मसात हुनेगरी स्थानीय कानून तर्जुमा गर्ने बताइन् । 

साथै न्यायिक समितिबाट भएका मिलापत्र वा निर्णय कार्यान्वयनलाई विशेष प्राथमिकता दिने पनि उनको भनाइ छ ।  स्थानीय न्याय प्रशासनलाई सक्षम र सुदृढ बनाउन दक्ष जनशक्तिको व्यवस्था, नियमित प्रशिक्षण, पारदर्शी र प्रभावकारी न्याय प्रणालीको विकास गर्ने पनि घोषणापत्रमा उल्लेख छ।  

डंगोलले न्यायिक समिति राष्ट्रिय सम्मेलनबाट न्यायिक समिति मञ्चको संस्थागत संरचना निमार्ण गर्ने निणर्य गरेको पनि बताइन् । सम्मेलनले विवाद निरुपण वा न्याय सम्पादनको काम गर्दा नेपालको संविधान, प्रचलित कानून, कार्यविधि, न्यायका मान्य सिद्धान्त, अदालतबाट भएका आदेश वा फैसला समेतको पूर्ण परिपालना गर्न सुनिश्चित गर्ने घोषणा पनि गरेको छ ।

त्यस्तै न्याय सम्पादनमा नैतिकता, निष्ठा र इमान्दारिता कायम राख्न न्यायिक समितिको आचारसंहिता जारी गरी परिपालना गर्ने, न्यायिक समितिको कार्य, अनुभव र अपेक्षाका विषयमा निरन्तर छलफल गर्ने, अन्तरक्रिया गर्ने र दिशाबोध गर्ने कार्यलाई निरन्तरता दिने समेत घोषणा गरेको छ ।