दमक नगरपालिका वडा नम्बर ५ का दुर्गाप्रसाद कंडेलले समयमा किस्ता नतिरेको भन्दै एनआईसी एसिया बैंकले घरमा नै सुरक्षा गार्ड खटाएको छ । बैंकले ३ दिन सुरक्षा गार्ड खटाएको हो। 

दैनिक ९ बजेदेखि बेलुकी ५ बजेसम्म खटाइएका सुरक्षा गार्डले कँडेलको घरमा सुरक्षा दिने गरेका थिए। यद्यपि अहिले गार्ड हटेका छन्। गार्डलाई नेत्रविक्रम चन्द विप्लव नेतृत्वको नेकपाका कार्यकर्ताको पहलमा फिर्ता पठाइएको हो ।

३ महिनादेखि कँडेलले बैंकको साँवा तथा ब्याज तिर्न सकेका थिएनन् ।

'खाएपछि समयमा तिर्नु पर्दैन ?' भनेर बैंकले घरमै गार्ड राखेको श्रीमती चन्द्रकलाले बताइन् ।

४ दिन पहिले बैंकले जति हुन्छ त्यति रकम लिएर आउनु भनेको र आफूले १० हजार रुपैयाँ मात्र लगेर जम्मा गरेको कँडेलले बताए ।

पैसा जम्मा गरेर घरमा आइनपुग्दै बैंकले धितो सुरक्षा गर्न भन्दै सुरक्षा गार्ड खटाएको हो। उनले १ करोड रुपैयाँ ऋण लिएका थिए । साँवा ब्याज गरेर ९७ लाख रुपैयाँ तिर्न बाँकी रहेको कँडेलले बताए ।

बैंकले खटाएका सुरक्षा गार्डले घरमा आउनेहरूलाई सलाम गर्ने गरेका थिए । उनले ३ वर्षअघि उक्त ऋण लिएका थिए ।

उनी प्लटिङ व्यवसाय गर्थे । ‘कित्ताकाट लामो समयसम्म रोकिँदा समस्या आयो,’ उनले भने, ‘आर्थिक मन्दीका कारण पनि जग्गाको कारोबार भएको छैन ।’ 

बैंकले समयमा साँवा ब्याज नतिर्दा चिठ्ठी काट्ने, सूचना टाँस्ने र लिलामीको प्रक्रिया गर्नुपर्नेमा घरमै सुरक्षाकर्मी पठाएर आफूहरूलाई बन्धक बनाएको कँडेल बताउँछन्। 

बैंकका मुख्य गुनासो व्यवस्थापन अधिकारी अर्जुनराज खँनियाले भने यो विषयमा  कुनै जानकारी नभएको बताए ।

भोलिसम्ममा बुझेर मात्रै जानकारी गराउन सक्ने उनले बताए ।