बलियो प्रतिद्वन्द्वी मनाङ मस्र्याङ्दीलाई पराजित गर्दै जावलाखेल युथ क्लव राजधानीमा जारी शहीद स्मारक ए डिभिजन लिगको शीर्ष स्थानमा उक्लिएको छ ।  
ललितपुरस्थित च्यासल मैदानमा शनिबार सम्पन्न खेलमा जावलाखेल युथ क्लवले मनाङ मस्र्याङ्दी क्लवलाई ३–० गोल अन्तरले हराउँदै शीर्ष स्थानमा उक्लिएको हो । 

खेलमा जावलाखेल युथबिरुद्ध मनाङ मस्र्याङ्दी निरिह बन्यो । एकतर्फी खेल देखाएको जावलाखेललाई जित दिलाउन एनकोटो मासोबीले दुई गोल गर्दा फोडे फोफानाले एक गोल थपे । अनपेक्षित रुपमा नतिजा निकालेको जावलाखेलले लिगको सर्वाधिक ८ पटकको च्याम्पिन मनाङ बिरुद्ध खेलको चौथो मिनेटमा मासोबीको गोलबाट अग्रता लिएको थियो ।

 त्यसपछि निर्धारित ९० मिनेटको खेलमा मनाङ खेलमा फर्किन असफल भएको थियो । तर  खेलको इन्जुरी समयमा जावलाखेलले दुई गोल थप्न सफल भयो । दोस्रो मिनेटमा फोफानाले टोलीका लागि दोस्रो गोल गर्दा चौथो मिनेटमा मासोबीले व्यक्तिगत दोस्रो गोल गर्दै जावलाखेललाई ३–० को जित दिलाएका हुन् । यस जितसँगै जावलाखेलले ९ खेलमा १७ अंक जोडेको छ । मनाङको १५ अंक भएको छ ।