राष्ट्रिय खेलकुद परिषद्का पूर्व सदस्य सचिव युवराज लामाले खेलकुद मेडल जित्नको लागि मात्रै नभएर राष्ट्र र राष्ट्रियताको लागि पनि हुनुपर्ने बताएका छन् ।

जापान गोजुरियो कराँते डो. मिसन संघ नेपाल केन्द्रीय समितिले भैरहवामा आयोजना गरेको कार्यक्रममा नेपाल कराँते महासंघका केन्द्रीय अध्यक्षसमेत रहेका लामाले भने, ‘अब खेलाडीले मेडल जित्ने, पदक जित्ने काममा मात्रै होइन, समाज र राष्ट्रको प्रगतिमा पनि अन्य निकायसँग हातेमालो गरेर अगाडि बढ्नुपर्छ ।’

लामाले आफू राष्ट्रिय खेलकुद परिषद्को सदस्य सचिव भइसकेको व्यक्ति कराँते खेलकुदको सम्वर्द्धन र एकताबद्ध विकासका लागि विशेष निर्णय लिई कराँते महासंघको अध्यक्षको जिम्मेवारी लिएको बताए ।

‘मैले धेरै सोच विचार गरेर सदस्य सचिव भइसकेको व्यक्ति, फेरि त्यही राखेपको अंगको रुपमा रहेको कराँते महासंघको अध्यक्ष बन्ने प्रस्ताव स्वीकार गरेको हुँ’, उनले भने, ‘एक किसिमले भन्दा म र दावा घटुवा भएर कराँते खेलकुदको विकास र एकताबद्धका लागि यस्तो निर्णय गरेका हौं ।’

लामा कराँते महासंघको अध्यक्ष र यसअघि महासंघको अध्यक्ष रहेका दावा लामा महासचिव भई यतिबेला कराँते महासंघलाई चलायमान गराइरहेका छन् ।