नेकपा एकीकृत समाजवादीले सबै जनवर्गीय संगठनको पदाधिकारी भेला गर्ने भएको छ ।

पार्टीले वैशाख २० गते काठमाडौंमा भेला गर्न लागेको हो ।

पार्टीका महासचिव घनश्याम भूसालको उपस्थितिमा बुधवार बसेको मोर्चा फाँटको बैठकले पार्टी निकट २२ भ्रातृ संगठनका पदाधिकारीको भेला गर्ने निर्णय गरेको हो ।

बैठकमा अन्तर्राष्ट्रिय अभ्यासको अध्ययन गरी समसामयिक राजनीतिक अवस्थामा त्यसलाई प्रयोग गर्न केन्द्रीय नीतिमा प्राथमिकतामा राखिने जनाइएको छ । पार्टीले अवलम्बन गरेको समाजवादी अर्थ व्यवस्थाको नीति तथा राजनीतिक दृष्टिकोणका साथै कार्ययोजनामा आवश्यक सुझाव दिन भेलामा राजनीतिक, आर्थिक र सामाजिक विषयवस्तुमा छलफल गरिने छ ।
 
महासचिव भुसालले पार्टीलाई देशभर संगठित गरी जनतालाई उत्पादनसँग जोडेर सामाजिक रूपान्तरण गरी जनमुखी बनाउन पार्टीको कार्यदिशा परिमार्जन गर्न भेला उपयोगी हुने विश्वास व्यक्त गरेका छन् । 

मोर्चा फाँटका इन्चार्ज डा. विजय पौडेलका अनुसार पार्टीमा गर्नुपर्ने आवश्यक सुधार तथा कार्ययोजनामा परिमार्जनका लागि सामूहिक धारणा भेलाले बनाउने छ । सामूहिक धारणाका आधारमा प्रतिवेदन बनाई पार्टी केन्द्रलाई बुझाउने छ ।

सबै संगठनका करीब २०० पदाधिकारी सहभागी हुने भेलालाई अध्यक्ष माधवकुमार नेपालले उद्घाटन गर्नेछन् ।