जलवायु परिवर्तनबाट पर्नसक्ने जोखिम न्यूनीकरण गराउन जलाधार व्यवस्थापनका कार्य अगाडि बढाइएको छ ।
      
गण्डकी जलाधार जलवायु उत्थानशील नामक कार्यक्रममार्फत रसुवामा जलवायु अनुकूलनसम्बन्धी काम गराउने कार्ययोजना स्वीकृत भएको आज धुञ्चेमा जानकारी दिइयो । 
             
वन तथा भूसंरक्षण विभाग, आइयुसियन नेपाल र राष्ट्रिय प्रकृति संरक्षण कोषको संयुक्त आयोजनामा रसुवासमेत २० जिल्लाको आधार इलाकामा कार्यक्रम विस्तार हुने आयोजक संस्थाले जनाएको छ ।
           
जलवायु परिवर्तनको असरले समुदाय र वातावरणीय क्षेत्रमा पार्ने असरलाई न्यूनीकरणका लागि सात उपजलाधार समूहमार्फत २० जिल्लाको आधार इलाकामा दुई लाख ८५ हजार पारिस्थितिकीय प्रणालीलाई जलवायुको अनुकूलित गर्ने जनाइएको छ ।
              
एक लाख एक हजार हेक्टर वनक्षेत्र, आठ हजार हेक्टर घाँसे मैदानको संरक्षण तथा ८३ वटा जलाधार क्षेत्र एवं ५६ हजार चार सय हेक्टर वनक्षेत्रको स्तरोन्नति गरिने कार्यक्रम अधिकृत लिना चालिसेको भनाइ छ ।
         
सो कार्यक्रमअन्तर्गत १० हजार उद्यमी तयार गर्ने, २० हजारलाई रोजगारी सिर्जना गर्ने एवं कार्बन उत्सर्जन न्यूनीकरण गर्नेलगायतका विविध कार्यक्रम सञ्चालन हुनेसमेत कार्यक्रम अधिकृत चालिसको भनाइ छ ।
      
    कार्यक्रममा सङ्घीय जलाधार स्रोतकेन्द्र कुलेखानीका प्रमुख श्यामप्रसाद न्यौपाने, प्रकृति संरक्षण कोषका जलवायु विज्ञ डा मनिषराज पाण्डे समेतका विज्ञले कार्यक्रमको उपादेयीताबारे प्रष्ट पारेका थिए ।