नेकपा एकीकृत समाजवादीका अध्यक्ष माधवकुमार नेपालले कोही रमाए पनि यो गठबन्धन नटुट्ने बताएका छन् । 

कैलालीमा सञ्चारकर्मीसँग कुरा गर्दै नेपालले कोही यो गठबन्धन टुटोस् भनेर रमाए पनि उनीहरूको मनोकामना पूरा नहुने बताएका हुन् । 

‘गठबन्धन टुट्ने भयो भनेर कोही रमाउन सक्छन् तर यो गठबन्धन टुट्दैन, आनन्दले अगाडि बढ्छ’ नेपालले भने । 

साथै उनले रवि लामिछानेलाई प्रधानमन्त्री बनाउने भन्ने हल्ला पनि आफूले नसुनेको बताए । 

‘मलाई यस प्रकरणमा टिप्पणी गर्नु जरुरी छैन । कसलाई के अफर भए भएनन् भन्ने कुरा भइरहन्छ । तर  यी हल्लाका कुरा हुन् । म आफूसँग भनेका छैनन्’ उनले भने । 

बरु रवि लामिछानेलाई सरकारमा ल्याउन आफूले सुझाव दिएको उनले बताए । 

‘रास्वपालाई सरकारमा ल्याउनुपर्छ भन्ने सुझाव दिएको छु’ उनले भने, ‘चुनाव अघि नै सरकारमा ल्याउने भन्ने थियो । निर्वाचनको कारणले रोकियो ।’

आफू देशमा अर्थतन्त्रको स्थिति सुधार, भ्रष्टाचार अन्त्य, रोजगारी बढाउने विषयमा गम्भीर रहेको पनि उनले बताए ।