भारतको उत्तर प्रदेशका मुख्यमन्त्री योगी आदित्यनाथको पार्टी भारतीय जनता पार्टी (भाजपा) ले निकाय चुनावमा उत्साहजनक जीत हात पारेको छ ।

नगर निकायका १७ मेयरका लागि भएको चुनावमा भाजपाले १७ मेयर नै जितेको छ । यो उत्साहजनक जीतसँगै मुख्यमन्त्री योगीले आगामी लोकसभा चुनावका लागि ‘मिसन २०२४’ लक्षित रणनीति बनाउन थालेका छन् ।

योगीले नवनिर्वाचित सबै मेयरहरूसँग टेलिफोनमा एक्लाएक्लै कुराकानी गर्दै विकासका एजेन्डा र आगामी कार्यक्रमबारे छलफल गरेका छन् ।

मुख्यमन्त्री योगी हाल गोरखपुर यात्रामा छन् । गोरखनाथ मन्दिरमा योगीले नवनिर्वाचित मेयर डा. मंगलेश श्रीवास्तव र अन्य निर्वाचित जनप्रतिनिधिसँग भेटघाट गरेर बधाई दिएका छन् ।

निकाय चुनावमा भाजपालाई जिताएकोमा मुख्यमन्त्री योगीले प्रदेशवासीलाई धन्यवाद समेत दिएका छन् ।

‘मिसन २०२४’ अन्तर्गत लोकसभा चुनावबाट निर्वाचित सांसदले केन्द्रमा प्रधानमन्त्री चयनदेखि सरकार बनाउने छन् । त्यसैले भाजपाले देशभर २०२४ को चुनावका लागि तयारी गरिरहेको छ । उत्तर प्रदेशमा योगी आदित्यनाथले मिसनको नेतृत्व गर्ने भारतीय सञ्चारमाध्यमले जनाएका छन् ।