बक्यौता नतिर्ने २७० ग्राहक विद्युत् प्राधिकरणको कालोसूचीमा

नेपाल विद्युत् प्राधिकरण वितरण केन्द्र भरतपुरले विगत लामो समयदेखि बक्यौता रकम नतिरेका २७० ग्राहकलाई कालोसूचीमा राखेको छ । 

वितरण केन्द्रले कालोसूचीमा रहेका ग्राहकको ३ पुस्ते मालपोत कार्यालय, नापी कार्यालय, जिल्ला प्रशासन कार्यालय र भरतपुर महानगरपालिका पठाउने तयारी शुरू गरेको हो ।

कार्यालयका इन्जिनीयर राजेन्द्र पौडेलका अनुसार ती कार्यालयबाट पाउने सेवा समेत वञ्चित हुने गरी कार्यालयले परिपत्र गर्न लागेको हो । कार्यालयले कालोसूचीमा रहेका ग्राहकबाट ७४ लाख ९२ हजार ८८१ रुपैयाँ बक्यौता रकम उठाउन बाँकी छ । ती ग्राहकले असार मसान्तसम्म बक्यौता रकम बुझाए जरिवानामा वितरण केन्द्रले १० प्रतिशत छुट दिने उनले जानकारी दिए ।

उनले भने, ‘बक्यौता तिर्ने ग्राहकका लागि यो छुट अवसर हो । सबैले प्रयोग गरौं ।’

वितरण केन्द्रअन्तर्गत १ लाखभन्दा बढी बक्यौता महशुल भएका १२ ग्राहक रहेका छन् । बक्यौता रकम नतिर्ने अन्य ग्राहकलाई समेत कालोसूचीमा राख्ने प्रक्रिया शुरू गरिएको उनले बताए । उनका अनुसार वितरण केन्द्रमा हाल ६५ हजार ग्राहक छन् ।