नक्कली भुटानी शरणार्थी प्रकरणमा प्रतिवादीहरूको खातामा रकम जम्मा गरिएको भौचरको प्रतिलिपीहरूलाई प्रमाणको रूपमा पेश गरिएको छ ।

जिल्ला सरकारी वकिल कार्यालयले २८ करोड ८१ लाख रूपैयाँ विगो दाबीसहित ३० जनाविरुद्ध काठमाडौं जिल्ला अदालतमा ठगी, संगठित अपराध, किर्ते, राज्यविरुद्धको अपराधसहित ५ किसिमको मुद्दा दर्ता गरेको छ ।

प्रतिवादी बालकृष्ण खाँणको कोठा खानतलासी गर्दा बरामद भएको खैरो रंगको नोटबुक १ थान, कालो रंगको डायरी ३ थान, सम्पत्ति विवरण पाना ३८ थान, च्यातिएर तीन टुक्रा पारिएको कागज जोड्दा नरेन्द्र जीसमेत भनी लेखिएको कागजको टुक्रालाई प्रमाणको रूपमा पेश गरिएको छ ।

नेपाल प्रहरीको प्रधान कार्यालय डिजिटल फरेन्सिक ल्याबबाट प्राप्त भएको परीक्षण प्रतिवेदन, प्रतिवादी सन्देश शर्माले जाहेरवाला गजेन्द्र बुढाथोकी र रामकुमार रेग्मीको नाममा काटिएको ५ थान सक्कल चेकलाई पनि प्रमाणको रूपमा पेश गरेको छ ।

प्रतिवादी सानु भण्डारीको घरबाट बरामद भई आएको नबिल बैंक लेखिएको र भित्र विभिन्न पानामा भुटानी शरणार्थीसम्बन्धीको रकम विवरण लेखिएको १ थान डायरीलाई पनि प्रमाणको रूपमा पेश गरिएको छ ।

प्रतिवादी इन्द्रजित राईले ७ लाख ५० हजार रूपैयाँ राजश्व दाखिला गरेको भौचर, ५० लाख र १ लाख ९३ हजार रूपैयाँको मेगा बैंकको किरात इन्टरनेशनल प्रालिको नामको बैंक खातामा निरज राई र इन्द्रजित राईले जम्मा गरेको भौचरलाई पनि प्रमाणको रूपमा पेश गरिएको छ ।

प्रतिवादी इन्द्रजित राईको कोठाबाट बरामद भएको सुमिरा कार्कीको नाममा जारी भएको सक्कल जग्गाधनी पुर्जा १ थान, बैना गरेको सक्कल कागज १ थान, मेगा बैंकको इन्द्रजित राईको नाममा रकम जम्मा गरिदिएको विभिन्न मितिको सक्कल भौचर ६ पानालाई प्रमाणको रूपमा पेश गरिएको छ ।

त्यसैगरी सानु भण्डारीको कोठाबाट बरामद भएको २०१६ नबिल बैंक लेखिएको डायरी १ थानलाई पनि प्रमाणको रूपमा पेश गरिएको छ ।

यस्तै विभिन्न प्रतिवादीहरूबाट बरामद भएको मोबाइलहरूलाई पनि प्रमाणको रूपमा पेश गरिएको छ ।

त्यस बाहेक देख्ने, सुन्ने बुझिएका मानिसहरूको बयान कागज, जाहेरवालाहरूले दिएको जाहेरी, विभिन्न बैंकहरूबाट माग गरिएको पत्रसहितका कागजातहरू, प्रतिवादीहरूले गरेको बयान कागजलाई मुख्य दसी तथा प्रमाणको रूपमा अभियोगपत्रका साथमा पेश गरिएको छ ।