सरकारको वार्षिक नीति तथा कार्यक्रम पारित गर्न प्रतिनिधि सभाको बैठक शनिवार राति अबेरसम्म चलेको छ । छलफल सकेर संशोधनलाई निर्णयार्थ पेश गरेपछि सभामुख देवराज घिमिरेले राति साढे ९ बजे नीति तथा कार्यक्रमलाई निर्णयार्थ पेश गरेका थिए । 

विपक्षी दलले मत विभाजन नमागेका कारण ध्वनी मतबाटै सरकारका नीति तथा कार्यक्रम बहुमतले पारित भयो । सरकारका नीति कार्यक्रम पारित गरेर प्रतिनिधि सभा बैठक आइतवार दिउँसो १ बजेसम्मका लागि स्थगित भएको छ । 

आइतवारको बैठकमा अर्थमन्त्री डा. प्रकाशशरण महतले आर्थिक सर्वेक्षण पेश गर्नेछन् । बजेट आउने अघिल्लो दिन अर्थमन्त्रीले संसदमा आर्थिक सर्वेक्षण पेश गर्ने परम्परा छ ।  सोमवार अर्थमन्त्रीले संघीय संसदको दुवै सदनमा आर्थिक वर्ष २०८०÷८१ का लागि बजेट पेश गर्नेछन् ।