भारतका प्रधानमन्त्री नरेन्द्र मोदीले अमेरिकाको भ्रमण गर्नुअघि अमेरिकी संसद्को एक शक्तिशाली समितिले भारतलाई नेटो प्लसमा समावेश गर्न सिफारिश गरेको छ । 

नेटो प्सलमा अहिले पाँच मुलुक अस्ट्रेलिया, न्युजील्यान्ड, जापान, इजरायल र दक्षिण कोरिया छन् । त्यसले विश्वव्यापी प्रतिरक्षा सहकार्यलाई मजबूत बनाउने लक्ष्य लिएको छ । 

भारतलाई पनि त्यसमा समावेश गर्दा यी मुलुकहरूबीचको सूचना साझा गर्ने काम अवरोधरहित हुनेछ । अनि भारतले छोटो समयमै अत्याधुनिक सैन्य प्रविधिमा पहुँच पनि पाउनेछ । 

ताइवानमाथि चीनको आक्रमण रोक्नका लागि भारतलाई पनि नेटो प्लसमा राख्नुपर्ने भनी हाउस सेलेक्ट कमिटी अन द स्ट्राटेजिक कम्पिटिशन बिटवीन द युनाइटेड स्टेट्स यान्ड द चाइनिज कम्युनिस्ट पार्टीले नीति प्रस्ताव पारित गरेको हो । 

पिरब्लिकन पार्टीको नेतृत्व रहेको यस समितिलाई चाइना कमिटी पनि भन्ने गरिएको छ । 

यस प्रस्तावमा भारतीय मूलका अमेरिकी रमेश कपूरले विगत ६ वर्षदेखि काम गर्दै आएका थिए । 

समितिले गरेको सिफारिशमा ताइवानमाथि चीनले आक्रमण गरेमा उसविरुद्ध आर्थिक प्रतिबन्ध लगाइनेछ अनि जी७, नेटो, नेटो प्ल्स फाइभ र क्वाडका सदस्यहरू पनि यसमा सहभागी बनेमा निवारण बलियो बन्नेछ ।