नेपाल दूरसञ्चार कम्पनी लिमिटेड (नेपाल टेलिकम) का भ्वाइस सेवाका प्रयोगकर्ता २ करोड नाघेका छन् ।

नेपाल दूरसञ्चार प्राधिकरणले जेठमा सार्वजनिक गरेको फागुनसम्मको तथ्यांक अनुसार टेलिकमको सीम कार्ड, ल्यान्डलाइन फोन, इन्टरनेट सहितबाट सेवा लिइरहेका भ्वाइसका प्रयोगकर्ताको संख्या २ करोड ८ लाख १ हजार पुगेको छ । 

टेलिकमको विभिन्न सेवा प्रयोग गर्ने यस्ता सेवाग्राहीमध्ये सबैभन्दा बढी प्रयोगकर्ता मोबाइलको सीमकार्ड प्रयोग गर्नेछन् । टेलिकमले वितरण गरेको सीमकार्डको विवरण अनुसार सबैभन्दा बढी प्रयोगकर्ता जीएसएम (पोस्टपेड तथा प्रिपेड) मोबाइलको सीमकार्ड प्रयोगकर्ता छन् ।

टेलिकमले वितरण गरेको जीएसएम सीम कार्डमा २ करोड प्रयोगकर्ता छन् । 

टेलिकमको प्रयोगकर्तामा सीडीएमए प्रविधिको सीमकार्ड प्रयोग गर्ने पनि छन् । सीडीएमए प्रयोगकर्ता अझै ३ लाख १९ हजार ६६२ छन् । टेलिकमले सीडीएमए प्रविधिलाई विस्थापन गर्दै लगेकाले यसका प्रयोगकर्ता घटिरहेका छन् ।

बजारमा अहिले टेलिकमले नयाँ सीमकार्ड वितरण गर्दा पनि जीएसएमका मात्रै गरिरहेको छ । 

टेलिकमका सहप्रवक्ता परमात्मा भट्टराईका अनुसार टेलिकमले पछिल्लो समय नयाँ प्रविधि थप नगरेको र टेलिमकले लगानी जीएसएम प्रविधिमा मात्रै गरेकाले सीडीएमए घट्दै गएको हो । अझै ३ लाख प्रयोगकर्ता भए पनि बिस्तारै यी पनि विस्थापित भएर जीएसएममा आउने भट्टराईले बताए । उनका अनुसार टेलिकमले सीडीएमएका ग्राहकलाई जीएसएममा सिफ्ट हुन प्रोत्साहन गरिरहेको छ ।

टेलिकमले भ्वाइस सेवाका लागि फाइबर टु द होममार्फत भ्वाइस सेवा पनि दिएको छ । यस्तो सेवाबाट भ्वाइस सेवा लिनेमा २ लाख ६६ हजार ८३३ ग्राहक रहेको टेलिकमले जानकारी दिएको छ । टेलिकमका अनुसार वायरलेस प्रविधिबाट १ लाख १६ हजार ९७४ सेवाग्राहीले भ्वाइस सेवा लिइरहेका छन् ।

टेलिकमको फिक्स्ड लाइन टेलिफोन (पीएसटीएन) प्रयोगकर्ता ४ लाख ४६ हजार ११८ छन् ।

भ्यावाइ सेवाबाहेक टेलिकमको ब्रोडब्याण्ड इन्टरनेट प्रयोगकर्ताको संख्या २ लाख ८१ हजार, केबल/एफटीटीएचका प्रयोगकर्ता ९ लाख ७३ हजार र लिज लाइन इन्टरनेटका प्रयोगकर्ता ८९० छन् । 

डाटा प्रयोगकर्तामा सबैभन्दा ठूलो हिस्सा मोबाइल ब्रोडब्याण्डको छ । टेलिकमका अनुसार फोरजीका प्रयोगकर्ता १ करोड २३ लाख ५७ हजार, थ्रीजीका प्रयोगकर्ता ५ लाख ८७ हजार र ईभीडीओका प्रयोगकर्ता १ लाख ३६ हजार छन् ।