सुदूरपश्चिममा पर्ने प्राकृतिक तथा आध्यात्मिक ठाउँ खप्तड क्षेत्रमा छायांकन गरिएको ‘सधैं यस्तै मीठा कुरा’ बोलको गीत सार्वजनिक गरिएको छ ।

नेपाली कांग्रेसका महामन्त्री गगनकुमार थापा र पूर्व पर्यटनमन्त्री प्रेम आलेले गीतको विमोचन गरेका हुन् । 

सुगम संगीतका चर्चित गीतकार तथा संगीतकार दिपक शर्माको शब्द र संगीत रहेको गीतमा स्वर डेभिड शंकर र बेनिशा पौडेलको रहेको छ । पर्यटकीय क्षेत्र खप्तडलाई सुटिङका लागि समेत उपयुक्त ठाउँका रुपमा प्रस्तुत गर्न खोजिएको म्युजिक भिडियो निर्माण संयोजन समेत गरेका कलाकार सनम कठायतले जानकारी दिएका छन् । 

डोटी घर भएका कलाकार कठायतले आफ्नो क्षेत्रलाई प्रवर्द्धनका लागि अभियानका रुपमा यसपटक खप्तडमा केही गीत सुटिङ गरिएको बताए । उनले भने, ‘हामीले आफ्नो कर्तव्य ठानेर यसपल्ट सुटिङ स्पट खप्तड रोज्यौँ । अभियानमा बझाङको खप्तड छान्ना गाउँपालिका, कार्की क्रियसनलगायतले सघाएका छन् ।’ यो गीतमा कठायतसँगै निशा कार्कीको अभिनय देख्न पाइन्छ । 

गीत निर्देशन खप्तड क्षेत्र फैलिएको अर्को जिल्ला बाजुरा घर भएर अहिले पत्रकारिताका साथै देउडा गीत लेखन र म्युजिक भिडियो निर्देशन समेत गरिरहेका डिबी खड्काले गरेका हुन् ।

क्रियटिभ निर्देशक जनक सिंह, सिनेमाटोग्राफर दीपक गिरीलगायत पनि सुदूरपश्चिमबाटै आएर नेपाली मनोरञ्जन क्षेत्रमा सक्रिय व्यक्ति हुन् । म्युजिक भिडियो सम्पादन विकास दाहालले गरेका छन् । 

गीत युट्युबमा ‘कार्की क्रियसन’बाट सार्वजनिक भएको छ ।