नेविसंघमा ७१० जनाको जम्बो केन्द्रीय समिति विस्तारको विरोधमा रहेको विधान सम्मत केन्द्रीय समिति बिस्तार पक्षधर सङ्घर्ष समितिले आजदेखि  केन्द्रीय कार्यालय सानेपामा अनशन सुरु गरेको छ।

नेविसंघ भित्र मौलाएको अधिनायकवाद र नेविसंघको विधान २०७५ को रक्षार्थ नाम दिएर नेविसंघ नेता गणेशमान शाह र रामजी बस्नेतले आजबाट अनशन सूरू गरेका हुन्। मागहरू सम्बोधन नभएसम्म अनशन जारी रहने नेता शाहले बताए।

नेविसंघमा अन्याय गरिएका देश भरका सङ्गठनमा दुख गरेका साथीहरूलाई विधान सम्मत न्याय गरियोस्,विधान सम्मत र समावेशी समिति गठन गरियोस् ,नेविसंघलाई विधान सम्मत पूर्णता दिइयोस् लगायतका माग राखी नेताहरू अनसन बसेको इतर समूहका नेता विनोद शाही ठकुरीले बताए। 

अनशन बाट पनि मागहरूको सम्बोधन नभए इतर पक्ष तदर्थ समिति गठन गर्न तयारी अवस्थामा रहेको उनले बताए । उनले भने "हामी पहिले विधान सम्मत निर्णय होस भन्ने चाहन्छौ र त्यसका लागि मौका दिइरहेका छौ यदि हाम्रो मागलाई नजर अन्दाज गरिए त्यसको हामी उचित जवाफ दिन्छौ"।

गएको श्रावण २२ गते नेविसंघ अध्यक्ष दुजाङ शेर्पाले ७१० जनाको अबैधानिक समिति गठन गरेपछि त्यसको विरोधमा अहिले नेविसंघमा इतर पक्षले आन्दोलन गरिरहेको छ।