ललितानिवासको सरकारी जग्गा हिनामिना प्रकरणमा ४ जना पूर्वमन्त्रीलाई पनि प्रतिवादी बनाउन सीआईबीले सिफारिश गरेको छ ।

जिल्ला सरकारी वकिलको कार्यालय काठमाडौंमा मंगलवार बुझाइएको प्रतिवेदनमा तत्कालीन उपप्रधान तथा भौतिक पूर्वाधार मन्त्री विजयकुमार गच्छदार र राज्यमन्त्री सञ्जय साह तथा तत्कालीन भूमिसुधार मन्त्रीद्वय चन्द्रदेव जोशी र डम्बर श्रेष्ठलाई पनि कीर्तेमा प्रतिवादी बनाउन सीआईबीले सिफारिश गरेको हो ।

कुल २९० जनालाई प्रतिवादी बनाउन सिफारिश गरिएकोमा ४ जना पूर्वमन्त्रीको नाम समेत उल्लेख रहेको सीआईबी स्रोतले लोकान्तरलाई जानकारी दियो ।

यस प्रकरणमा पक्राउ परेर छुटेका सञ्चार सचिव कृष्णबहादुर राउतलाई भने प्रतिवादी बनाउन सिफारिश गरिएको छैन ।

कुल १८ अर्ब ३४ करोड बराबर बिगो कायम हुनुपर्ने समेत प्रतिवेदनमा उल्लेख रहेको स्रोतले बतायो ।