नेपाल नेत्रज्योति संघ र कतार च्यारिटीका बीचमा आँखा स्वास्थ्य क्षेत्रमा सहकार्य गर्नेसम्बन्धी सम्झौतापत्रमा हस्ताक्षर भएको छ । 

आज दुई संस्था विच नेत्रज्योति भवनमा भएको सम्झौतापत्रमा नेपाल नेत्रज्योति संघका तर्फबाट संघका अध्यक्ष प्राडा चेतराज पन्त र महासचिव भरतबहादुर चन्द तथा कतार च्यारिटीका तर्फबाट कन्ट्री डाइरेक्टर मोहम्मद बकास र कार्यक्रम व्यबस्थापक इरसाद अलि शेखले हस्ताक्षर गरेका छन् । 

उक्त सम्झौताअनुसार बाँके, कपिलबस्तु, रौतहट, सुनसरी र सर्लाही जिल्लाहरूका ग्रामिण क्षेत्रका नागरिकलाई लक्षित गरेर विभिन्न आँखा शिबिरको आयोजना गरी २ हजार २ सय मोतियाबिन्दुका बिरामीहरुको निःशुल्क शल्यक्रिया गरिनेछ । आँखा शिविर तथा शल्यक्रियाका लागि आर्थिक सहयोग कतार च्यारिटीले तथा प्राविधिक सहयोग नेपाल नेत्रज्योति संघले गर्ने बताइएको छ ।

उक्त सम्झौतापत्र हस्ताक्षर कार्यक्रममा बोल्दै संघका कार्यकारी निर्देशक डा शैलेशकुमार मिश्रले कतार च्यारिटीजस्तै दातृ निकायहरूको सहयोग र सहकार्यमा सन् २०३० सम्ममा नेपालबाट उपचारपछि निको हुने पूर्ण रुपमा आँखा नदेखिने समस्या निवारण हुने विश्वास व्यक्त गरे । 

त्यस्तै उक्त कार्यक्रममा बोल्दै कतार च्यारिटीका कन्ट्री डाईरेक्टर मोहम्मद बकासले च्यारिटीले विगत ५ वर्षदेखि शिक्षा, स्वास्थ्य, खानपानी र जिविकोपार्जन क्षेत्रमा कार्य गर्दै आइरहेको र स्वास्थ्य क्षेत्रमा मोतियाबिन्दुको सर्जरीमार्फत् दृष्टि पुर्नस्थापनाका लागि नेत्रज्योति संघसँग यो सम्झौता गरिएको र यसबाट २ हजारभन्दा बढी बिरामी प्रत्यक्ष रुपमा लाभान्वित हुने बताए । 

अहिले पनि नेपालको आँखा उपचार सेवा सस्तो र गुणस्तरिय भएकाले विभिन्न देशका नागरिक यहाँ आँखा उपचार गराउन आइरहेको जनाउँदै संघका महासचिव भरतबहादुर चन्दले नेपाललाई आँखा उपचारको पर्यटन गन्तव्यका रुपमा विकास गर्ने लक्ष्यसहित संघले आफ्ना कार्यक्रमहरू अगाडि बढाइरहेको बताए ।  

उक्त कार्यक्रममा बोल्दै संघका अध्यक्ष प्राडा चेतराज पन्तले कतार च्यारिटीसँगको सहकार्यले आर्थिक अभावकै कारण आँखा उपचारबाट बञ्चित नागरिकले निःशुल्क आँखा उपचार प्राप्त गर्न सक्ने विश्वास समेत व्यक्त गरे । 

संघले हाल देशभरमा २७ वटा आँखा अस्पताल, १५० आँखा उपचार केन्द्र र ४४ वटा जिल्ला शाखाहरूमार्फत सस्तो मूल्यमा गुणस्तरीय आँखा उपचार सेवा प्रवाह गर्दै आइरहेको छ भने विभिन्न दातृ निकाय, सरकार तथा विभिन्न स्थानीय तहसँगको सहकार्यमा वार्षिक हजारौँ निशुल्क आँखा जाँच तथा शल्यक्रिया शिबिर सञ्चालन गर्दै आइरहेको छ ।

त्यस्तै कतार च्यारिटीले ‘नेपाल एकीकृत विकास कार्यक्रम (एनआईडीपी)–२’ परियोजनाअन्र्तगत नेपालका विभिन्न ९ जिल्लामा स्थानीय साझेदारहरूको सहकार्यमा विभिन्न कार्यक्रम सञ्चालन गर्दै आइरहेको छ । च्यारिटीले नेपालमा विशेषगरी उत्पादनशीलता र स्वास्थ्यको क्षेत्रमा सहयोग गर्दै आइरहेको छ ।