पद खुस्किएको १८ दिन बितिसक्दा पनि कोशी प्रदेशकी निवर्तमान स्वास्थ्यमन्त्री निर्मला लिम्बूले सरकारी निवास (क्वाटर) नछाडेको पाइएको छ । गत भदौ २१ गते सर्वाेच्च अदालतको आदेशपछि मुख्यमन्त्री उद्धव थापा पद मुक्त भएका थिए । मुख्यमन्त्रीसँगै जनता समाजवादी पार्टी (जसपा)को कोटाबाट मन्त्री बनेकी लिम्बू पनि पदबाट हटेकी थिइन् । तर स्रोतका अनुसार उनले सरकारी निवास छोड्ने छाँट देखाइकी छैनन् ।

कोशीकोे स्वास्थ्यमन्त्रीबाट हटे पनि उनले बूढीगंगा गाउँपालिकाको हात्तीमुढामा रहेको मन्त्रीको सरकारी निवास प्रयोग गरिरहेकी छिन् ।  केही दिनदेखि संघीय राजधानी काठमाडौंमा रहेकी लिम्बूका सामान मन्त्री क्वाटरमै रहेको स्वास्थ्य मन्त्रालयका कर्मचारीहरूले बताएका छन् ।

‘मन्त्री पद गएपछि हामीले खाली गरिदिनु भनेर भन्यौं  । मन्त्रीज्यूले अहिलेसम्म खाली गर्नु भएको छैन,’ ती कर्मचारीले भने । 

स्वास्थ्य मन्त्रालयले मिठाकुमारी खतिवडाको तीन तलाको घर २९ हजार रुपैयाँ मासिक बुझाउने गरी पुस मसान्तसम्म थप सम्झौता गरेको छ । 

यस्तोमा सोमवार मात्रै मुख्यमन्त्री हिक्मतकुमार कार्कीले कोशीमा ४ जना मन्त्री थप्दै कार्यभार पनि हेरफेर गरेका थिए । यसअघि खानेपानी, ऊर्जा तथा सिँचाइ मन्त्रालयको जिम्मेवारी पाएका तिलकुमार मेन्याङ्बोलाई स्वास्थ्यमन्त्री बनाएका छन् ।

तर पूर्वमन्त्री लिम्बूले नछाडेका कारण नवनियुक्त मन्त्री मन्त्रालयको क्वाटरमा जान पाएका छैनन् । ‘मंगलवारदेखि नयाँ मन्त्री आउने बताउँदै आउनु भएको छ । खोइ अब के गर्ने हामी पनि अलमलमा परेका छौँ,’ स्वास्थ्य मन्त्रालयका ती कर्मचारीले भने ।

मन्त्री पदबाट हटेको सात दिनभित्रमा सरकारी आवास छाड्नु पर्ने कानूनी व्यवस्था रहेको छ । मुख्यमन्त्री र मन्त्रीहरूको पारिश्रमिक र सुविधासम्बन्धी ऐन, २०७५ को अनुसूची १ मा उल्लेख भएअनुसार उनीहरूले पदको शपथ ग्रहण गरेको मितिदेखि सरकारी आवास सहितका सुविधाहरू पाउँछन् । आवास सुविधासम्बन्धी दफा ८ मा भनिएको छ, ‘यस दफा बमोजिमको सुविधा मुख्यमन्त्री र मन्त्रीहरूले आफ्नो कार्यकाल समाप्त भएको मितिले सात दिनसम्म पाउनेछन् ।’

पुन: मन्त्री बन्ने सम्भावना भएकाले उनले क्वाटर छाड्न नमानेको हुन सक्ने कर्मचारीहरू बताउँछन् । 

गत भदौ ४ मा निवर्तमान मुख्यमन्त्री उद्धव थापाले लिएको विश्वासको मतलाई असंवैधानिक ठहर गर्दै सर्वाेच्चले भदौ २२ गते संविधानको धारा १६८ (३) अनुसारको सरकार गठनका लागि परमादेश जारी गरेको थियो । लिम्बू साउन २६ गते मन्त्री बनेकी थिइन । उनी २८ दिन मात्रै मन्त्री बनेकी छिन् । थापा सत्ता गठबन्धनको तर्फबाट नेपाली कांग्रेसबाट मुख्यमन्त्री बनेका थिए । 

परमादेशपछि गत भदौ २२ गते मुख्यमन्त्रीमा नेकपा (एमाले)का हिक्मत कार्की नियुक्त भएका छन् ।