बूढानीलकण्ठमा निर्माण गरिएको ‘होटल फरेस्ट इन’सम्बन्धी फाइल अगाडि नबढेपछि आक्रोशित बन्दै मन्त्रालय पुगेका नेपाली कांग्रेसका सांसद दीपक खड्कालाई वन तथा वातावरणमन्त्री मन्त्री वीरेन्द्र महतोले जवाफ फर्काएका छन् ।

मंगलवार दिउँसो मन्त्रालयमा सञ्चारकर्मीका प्रश्नको जवाफ दिँदै उनले आफ्ना कारण होटल निर्माणको फाइल नरोकिएको स्पष्ट पारेका हुन् ।

मन्त्री महतोले ऐन–कानूनमा समस्यासँगै कर्मचारीको पनि अटेरीका कारण उक्त फाइल अड्किएको बताएका छन् । त्यो फाइलबारे आफूले प्रधानमन्त्री पुष्पकमल दाहाल प्रचण्डसँग कुरा राखेको र उनीबाट ‘फास्ट ट्रयाक’बाट कानून निर्माणका लागिरहेको आश्वासन पाएको मन्त्री महतोले जानकारी दिए ।  

कर्मचारीले टेर्दैनन् भने के म पिट्न जानु ? उनीहरूले हस्ताक्षर गरेपछि मात्र मैले हस्ताक्षर गर्नुपर्ने नियम छ । यो संविधान र ऐन–कानूनमै छ । कर्मचारीले हस्ताक्षर नगरी मैले मात्र गर्दा हुन्छ त ?’, आक्रोशित हुँदै उनले भने, ‘प्रधानमन्त्रीसँग मैले बारम्बार कुरा राखेको छु । उहाँ प्रयासरत हुनुहुन्छ, कुन नियम–कानून परिवर्तन गर्नु छ, ल्याउनुहोस् भन्नुभएको छ । २०२८ सालको कानून परिवर्तन गर्न लागिरहनुभएको छ । फास्ट ट्रयाकबाट कानून बनाउन लागिपर्नु भएको छ ।’

‘होटल फरेस्ट इन’सम्बन्धी फाइल रोकिएको भन्दै कांग्रेसका सांसद खड्काले वनमन्त्रीको कार्यकक्षमै अनशन बस्ने चेतावनी दिएका छन् ।

मंगलवार मन्त्री वीरेन्द्र महतोको कार्यकक्षमै पत्रकार सम्मेलन गरी खड्काले मन्त्रीको कोठाभित्रै अनशन बस्ने चेतावनी दिए । 

संखुवासभाबाट प्रत्यक्ष निर्वाचित सांसद खड्काको लगानी रहेको उक्त होटल वातावरणीय प्रभाव मूल्यांकन (ईआईए) नगरी बनाइएको भन्दै वन मन्त्रालयले ५ लाख रुपैयाँ जरिवाना गराएको थियो ।

‘कि मेरो फाइल फिर्ता दिनुस्, कि त स्वीकृत गर्नुस्,’ मन्त्रीसमक्ष खड्काले भने, ‘म यहाँबाट निस्किन्न, बल प्रयोग गर्नुभयो भने म पनि बल प्रयोग गर्छु ।’