यही माघ ११ गते हुने राष्ट्रिय सभा सदस्यको निर्वाचनको लागि आज राति १२ बजेदेखि निर्वाचन आचारसंहिताको अवधि शुरू हुने निर्वाचन आयोगले जनाएको छ । 

आयोगले सोमवार विज्ञप्ति जारी गर्दै राष्ट्रिय सभा सदस्य निर्वाचनको प्रचारप्रसार आज मध्यरातिदेखि निषेध गरिएको जनाएको छ । यस अवधिमा आचारसंहिता विपरीतका कुनै पनि गतिविधि नगर्न आयोगले सचेत गराएको छ । 

‘राष्ट्रिय सभा सदस्य निर्वाचनमा स्वच्छता, निष्पक्षता, पारदर्शिता तथा भयमुक्त वातावरण कायम राख्न सम्बत  २०८० माघ ८ गते राती १२ बजेपछि मतदान कार्य समाप्त नहुन्जेलसम्म राजनीतिक दलका पदाधिकारी, उम्मेदवार, दलको भ्रातृ सङ्गठन तथा आचारसंहिता पालना गर्नुपर्ने अन्य व्यक्ति, संस्था वा निकायले निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा सम्मेलन, कार्यशाला गोष्ठी आदि गर्न नहुने, कुनै पनि विधि, प्रक्रिया वा माध्यमबाट मत माग्न र निर्वाचन प्रचारप्रसार गर्न नहुने’, आयोगले भनेको छ, ‘सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसारका सामग्री पोष्ट वा शेयर गर्न वा गराउन नहुने हुँदा सो बमोजिम आचरण पालना गर्न गराउन अनुरोध गरिन्छ ।’

माघ ११ गते सात वटै प्रदेशमा १९ सदस्यको लागि हुने निर्वाचनको लाग आवश्यक सुरक्षा व्यवस्थासहितको तयारी पूरा भएको पनि आयोगले जनाएको छ । 

राष्ट्रिय सभामा निर्वाचनमा  निर्वाचक मण्डलको सदस्य प्रदेश सभाका सदस्य र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख हुनेछन् । 

११  गते बिहान ९ बजेदेखि अपरान्ह ३ बजेसम्म सम्बन्धित प्रदेशको तोकिएका मतदान स्थल तथा मतदान केन्द्रहरूमा मतदान गर्ने कार्यक्रम छ । 

यस निर्वाचनमा प्रदेश सभाका सदस्यहरूका लागि सेतो रङको कागजमा हरियो रङको मसीको विवरण तथा निर्वाचन चिह्न रहेको मतपत्रको व्यवस्था छ । 

गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखहरूका लागि सेतो रङको कागजमा रातो रङको मसीको विवरण तथा निर्वाचन चिह्न रहेको मतपत्रहरूको व्यवस्था आयोगले जनाएको छ । 

निर्वाचक मण्डलका सबै मतदाताहरूले गोप्य मतदान गर्न सक्ने आयोगका सहसचिव एवं सह–प्रवक्ता शालिकराम शर्मा पौडेलले जारी गरेको विज्ञप्तिमा उल्लेख छ ।