सरकार विस्तारमा ढिलाइ गरिरहेको कोशी प्रदेश सरकार बेमौसमी कर्मचारी सरुवामा भने अगाडि देखिएको छ । 

आन्तरिक मामिला तथा कानूनमन्त्रालयअन्तर्गत रहेका यातायात कार्यालयहरूमा यतिबेला सरुवाको चलखेल भइरहेको छ । सामान्यतय आर्थिक वर्ष शुरू भएपछि दुई वर्ष पुगेका तल्लो तहका कर्मचारीलाई सरुवा गर्ने प्रचलन छ । 

तर, अहिलेका आन्तरिक मामिला तथा कानूनमन्त्री शमशेर राईको निर्देशनमा पुस तेस्रो सातायता माघ २२ गतेसम्म झण्डै १६ जना कर्मचारी सरुवा भएका छन् । मन्त्रालयले थप अरु पनि सरुवा गर्न खोजेको लोकान्तरसँग स्रोतले दाबी गर्यो ।  

प्रदेशमा मालदार कार्यालयका रुपमा विराटनगर, इटहरी, बिर्तामोड लगायतका यातायात कार्यालयहरूलाई लिने गरिएको छ । प्रदेश संरचना बनेयता अपवादबाहेक यातायातबाटै यातायातमा सरुवा गर्ने प्रचलनलाई समेत तोडेर आफूनिकट र अनावश्यक चलखेल गर्न सक्नेहरूलाई सरुवा गरिएको स्रोतको दाबी छ । 

निजामती कर्मचारी संगठनका कोशी प्रदेश अध्यक्ष काशी पराजुलीले मापदण्ड नबनाइ कर्मचारीको बेमौसमी सरुवा गर्नु राम्रो नभएको बताए । 

आन्तरिक मामिला तथा कानून मन्त्रालयका उपसचिव गणेश नायकले सात–सात जना मुख्यमन्त्री कार्यालय र आफू कार्यरत मन्त्रालयले मात्रै आन्तरिक सरुवा गरेको जानकारी दिए ।

आठौँ तहका कर्मचारीसम्म कानून मन्त्रालयले नै सरुवा गर्ने भए पनि नवौँ तहमाथिका भने मुख्यमन्त्री कार्यालयले सरुवा गर्ने गरेको मन्त्रालयका सचिव लक्ष्मी पौडेलले बताए । उनले भने, ‘यो हाम्रो क्षेत्राधिकार भित्रको कुरा हो ।’ 

तर, कतिपय कर्मचारीले भने सरुवालाई सहजरुपले लिन नसक्ने बताएका छन् । केही कर्मचारीलाई काखी च्यापेर प्रदेशकै बढी आम्दानी हुने कार्यालयका रुपमा हेरिएको इटहरीमा सरुवा गरिएको आरोप कर्मचारीहरूको छ । 

‘ती कर्मचारीहरूमा पहिला पनि यातायातमा रमाइरहेका, दुई वर्ष एउटा यातायात कार्यालयमा बसिसकेका र अलिक कम आम्दानी हुने यातायात कार्यालयमा डेढ वर्षसम्म बसेकाहरू छन्,’ एक कर्मचारीले भने ।

नवौ तहदेखिका कर्मचारीलाई भने मन्त्रालयले सरुवा गर्ने गरेको छ । ‘मन्त्री र सचिवसँग नजिक भएका कर्मचारीले मात्रै राम्रो ठाउँमा जाने प्रचलन केन्द्रमा पनि थियो,’ ती कर्मचारीले भने संघीयता आएपछि तल्लो तहका कर्मचारीलाई पनि समान अधिकार भने पनि अवस्था उस्तै छ ।’ 

गत असोजमा नेपाली कांग्रेसबाट विद्रोह गरेर नेकपा (एमाले)को सहयोगमा मुख्यमन्त्री बनेका केदार कार्कीले सरकारलाई पूर्णता दिन सकेका छैनन् । तर उनी नेतृत्वको सरकार बेमौसमी कर्मचारी सरुवामा भने अगाडि देखिएको छ ।

सरुवा गर्ने कानूनमन्त्री राई मुख्यमन्त्रीकै दल कांग्रेसबाट मन्त्री बनेका हुन् ।