अमेरिकाले गुगलका एक पूर्व सफ्टवेयर इन्जिनियरलाई आर्टिफिसियल इन्टेलिजेन्स (एआई) को व्यापारसम्बन्धी महत्वपूर्ण डाटा चोरी गरी दुई चिनियाँ कम्पनीका लागि गोप्य रूपमा काम गरिरहेको आरोपमा पक्राउ गरेको छ ।

लियोन डिङ भनेर चिनिने लिनवेई डिङलाई क्यालिफोर्नियामा चारवटा आरोपमा अभियोगमा बुधबार पक्राउ गरिएको बीबीसीले जनाएको छ । उनले ५ सयभन्दा बढी गोप्य फाइलहरू चोरेको आरोप छ ।

उनीमाथि लगाइएको आरोप गुगलको सुपरकम्प्युटिङ डाटा सेन्टरहरूको पूर्वाधारसँग सम्बन्धित छ, जुन ठूला एआई मोडेलहरू होस्ट गर्न र तालिम दिन प्रयोग गरिन्छ।

उनले कथित रूपमा गुगलको नेटवर्कमा भण्डारण गरिएको जानकारी मे २०२२ मा व्यक्तिगत गुगल खातामा अपलोड गर्न थालेको खबरमा उल्लेख छ ।

दोषी प्रमाणित भएमा उनलाई १० वर्ष कैद र प्रति कसुर २ लाख ५० हजार डलर जरिबानाको सजाय हुने खबरमा उल्लेख छ । डिङलाई गुगलले २०१९ मा एआई सम्बन्धी सफ्टवेयर विकास गर्ने जिम्मेवारी दिएर काममा लगाएको थियो ।