नेपाल उद्योग वाणिज्य महासंघका अध्यक्ष चन्द्रप्रसाद ढकालले शान्ति र समृद्धिबीचको सम्बन्धलाई आत्मसाथ गर्दै नेपालमा लगानी बढाउन आग्रह गरेका छन् । 

अवैतनिक कन्सुलर कर्प्स नेपाल एसोसिएसनले  आयोजना गरेको लुम्बिनी कन्क्लेभलाई  सम्बोधन गर्दै अध्यक्ष ढकालले यस्तो आग्रह गरेका हुन् । 

विश्व शान्तिको केन्द्र तथा भगवान बुद्धको जन्मस्थल लुम्बिनीमा उभिएर शान्ति र समृद्धि बीचको गहिरो सम्बन्धलाई आत्मसाथ गर्न लगानीकर्ता तथा कूटनीतिक समुदायलाई उनको आग्रह थियो ।

शान्तिले आवश्यक स्थिरता प्रदान गर्ने उनको भनाइ थियो ।

'शान्तिले आवश्यक स्थिरता प्रदान गर्दछ, शान्तिको अवस्थामा व्यवसाय तथा उद्यमहरू डरविना स्वतन्त्रपूर्वक सञ्चालन हुँदा लगानी, उद्यमशीलता र आर्थिक वृद्धिका लागि सबैभन्दा राम्रो वातावरण बन्छ', उनले भने ।

लुम्बिनीबाट नेपालमा रहेको शान्त वातावरणको उपयोग गर्न लगानीकर्ताहरूलाई उनले आग्रह गरेका हुन् । 

आगामी लगानी सम्मेलनमा बढीभन्दा बढी लगानीकर्ताहरूलाई सहभागी गराइ लगानी जुटाउन पनि अध्यक्ष ढकालले आग्रह गरे ।

आध्यात्मिक तथा साहसिक पर्यटन, जलविद्युत तथा स्वच्छ उर्जा, कृषि प्रशोधन र सूचना प्रविधिका क्षेत्रमा बाह्य लगानीका लागि उदार नीति तथा लगानीमैत्री वातावरण बनाउन सरकार र निजी क्षेत्रले मिलेर काम गरिरहेको उनले जानकारी गराए ।

प्रत्यक्ष विदेशी लगानीका लागि थप अवसरहरू सृजना भएकाले यसको उपयोग गर्न उनले आग्रह गरे ।