’ट्रष्ट माइक्रो इन्स्योरेन्स कम्पनी’ले रुपन्देहीबाट सेवा शुरू गरेको छ ।

बुटवलका उद्यमी जगतबहादुर पोखरेलको नेतृत्वमा ७१ जना व्यवसायी मिलेर रुपन्देहीको तिलोत्तमा नगरपालिका जानकीनगरमा मुख्य कार्यालय राखेर माइक्रो इन्स्योरेन्स कम्पनी स्थापना गरेका हुन् ।

कूल ७५ करोड रुपैयाँ चुक्ता पूँजी राखेर नेपाल बीमा प्राधिकरणबाट स्वीकृत प्राप्त उक्त लघु नीर्जीवन बीमा कम्पनीले तिलोत्तमामा मुख्य कार्यालय राखेपनि सेवा भने काठमाडौंसहित धेरै जिल्लाबाट प्रवाह गर्ने भएको छ ।

मध्यम वर्गका नागरिक, साना तथा मझौला व्यवसायीलाई बीमाको मूलधारमा ल्याउने उद्देश्यका साथ माइक्रो इन्स्योरेन्स कम्पनी सञ्चालन गर्न लागिएको अध्यक्ष जगतबहादुर पोखरेलले बताए ।

साथै उनीहरूको सम्पत्तिमा प्राकृतिक प्रकोप, आकस्मिक दुर्घटनाबाट हुने हानी तथा जोखिमलाई न्यूनीकरण गर्न सघाउने पनि उनले प्रतिबद्धता व्यक्त गरे ।

‘कम्पनीले ५० लाखभन्दा कमको नीर्जीवन बीमा व्यवसायअन्तर्गत लघु मोटर बीमा, लघु सम्पत्ति बीमा, लघु घर बीमा, लघु सामुद्रिक बीमा, लघु व्यक्तिगत दुर्घटना बीमा, लघु सामुहिक दुर्घटना बीमा, कृषि तथा पशुपंक्षी लघु बीमालगायतका बीमा व्यवसाय गरी सर्वसाधारणलाई भैपरी आउने दुर्घटनाजन्य तथा दैवीप्रकोपजन्य हुने हानी–नोक्सानीमा राहत दिनेछ,’ शनिवार आयोजित कार्यक्रममा उनले भने ।

पोखरेलले नेपालीहरूलाई बीमाको मूलधारमा ल्याउन र उनीहरूको सम्पत्तिको संरक्षणमा बीमाको पहुँच पुर्याउन बीमासम्बन्धी सचेतना ल्याउने खालका कार्यक्रम ल्याउने बताए ।

सरकारले हरेक प्रदेशमा एउटा–एउटा लघु बीमा कम्पनीलाई सेवा सञ्चालनका लागि अनुमति दिने गरेको छ । लुम्बिनी प्रदेशमा ’ट्रस्ट माइक्रो इन्स्योरेन्स कम्पनी’लाई अनुमति दिइएको हो ।