स्वास्थ्य सामग्री खरिदमा २ करोड ८९ लाख रुपैयाँ भ्रष्टाचार भएको हस्पिटेक इन्टरप्राइजेजका प्रबन्ध निर्देशक विशाल पण्डितसहित ७ जनाविरुद्ध भ्रष्टाचार मुद्दा दायर भएको छ ।

पण्डितका अलावा स्वास्थ्य निर्देशनालयका तत्कालीन निर्देशक चन्द्रदेव मेहतालगायतलाई प्रतिवादी बनाएर अख्तियार दुरुपयोग अनुसन्धान आयोगले आइतबार विशेष अदालतमा मुद्दा दायर गरेको हो ।

कोभिड महामारीको समयमा कोशी प्रदेशमा स्वास्थ्य सामग्री खरिद गर्दा भ्रष्टाचार भएको पाइएको भन्दै मुद्दा दायर भएको विशेष अदालतका सूचना अधिकारी धनबहादुर कार्कीले बताए ।

मोरङको कोशी अस्पताल कोभिड-१९ केन्द्र, विराटनगरमा स्वास्थ्य उपकरण जडान तथा सञ्चालन गर्न सामग्री खरिदको लागि स्वास्थ्य निर्देशनालय धनकुटाले बोलपत्र आह्वान गरेको थियो ।

बोलपत्रमा न्यून कबोल गर्नेलाई छनोट नगरी अनियमितता गरेको पाइएपछि अख्तियारले मुद्दा दायर गरेको हो ।

अख्तियारले मेहतासहित बायोमेडिकल इन्जिनियर कुशल दाहाल, लेखा अधिकृत डण्डरसिंह विश्वकर्मा, खोप अधिकृत उदेश कुमार श्रेष्ठ, हस्पिटेकका सञ्चालक विशाल पण्डित र हस्पिटेकक बजार व्यवस्थापक मनोजकुमार आचार्यलाई जनही २  करोड ८९ लाख ६६ हजार ५० रुपैयाँ बिगो कायम गरी मुद्दा दर्ता गरेको छ ।

पेश भएका कुनै पनि बोलपत्र सारभूत रुपमा प्रभावग्राही नभएको अवस्थामा पुनः बोलपत्र प्रक्रिया थालनी गर्नुपर्नेमा तयस्तो नगरेको अभियोगपत्रमा उल्लेख छ ।

योग्यता पूरा गरेको भनी प्राविधिक दृष्टिकोणबाट प्रक्रिया पूरा नभएको बोलपत्रलाई प्रक्रिया पूरा भएको भनी मूल्याङ्‍कन समितिबाट गलत लिखत तयार गरी/गराई प्रतिवेदनको आधारमा टेन्डर दिइएको आयोगको विज्ञप्तिमा उल्लेख छ ।

बोलपत्र मूल्याङ्‍कन समितिको बैठकले बोलपत्रमा रहेको भिन्नता खुलाउनुपर्ने अनिवार्य व्यवस्थाको प्रतिकूल सबैभन्दा बढी रकम कबोल गर्ने हस्पिटेकद्वारा पेश भएको बोलपत्र स्वीकृत गर्ने निर्णय गरी/गराई उपकरण खरिद गरेको अभियोगपत्रमा उल्लेख छ ।