नेपाल राष्ट्र बैंकले देशको वर्तमान आर्थिक तथा वित्तीय स्थिति सार्वजनिक गर्दै वैदेशिक संचिति हालसम्मकै उच्च १८ खर्ब ७२ अर्ब रहेको जनाएको छ ।

उक्त संचितिले १४ दशमलव ८ महिनाका लागि वस्तु तथा १२ दशमलव ४ महिनाका लागि वस्तु तथा सेवाको आयात धान्न पर्याप्त रहेको राष्ट्र बैंकले जनाएको छ । 

राष्ट्र बैंकले बिहीवार सार्वजनिक गरेको तथ्यांकमा अघिल्लो आर्थिक वर्षको यही समयको तुलनामा रेमिट्यान्स २१ प्रतिशतले बढेको उल्लेख छ । 

’विप्रेषण आप्रवाह नेपाली रुपैयाँमा २१.० प्रतिशतले र अमेरिकी डलरमा १८.८ प्रतिशतले बढेको छ,’ तथ्यांकमा भनिएको छ, ’शोधनान्तर स्थिति रू ३ सय २७ अर्ब ५५ करोडले बचतमा रहेको छ ।’

त्यस्तै समग्र व्यापार घाटा २ दशमलव ५ प्रतिशतले कम भएको राष्ट्र बैंकले जनाएको छ । 

’वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ४ दशमलव ८२ प्रतिशत रहेको र आयात २ दशमलव ७ प्रतिशत, निर्यात ४ दशमलव शून्य प्रतिशत र कुल वस्तु व्यापार घाटा २ दशमलव ५ प्रतिशतले घटेको छ,’ तथ्यांकमा भनिएको छ ।

कुल विदेशी विनिमय सञ्चिति १८ खर्ब ७२ अर्ब ८२ करोड र अमेरिकी डलरमा १४ अर्ब १४ करोड रहेको छ ।

राष्ट्र बैंकका अनुसार नेपाल सरकारको खर्च रू ८ खर्ब ०१ अर्ब ५८ करोड रहेको छ भने राजस्व परिचालन रू ६ खर्ब ३९ अर्ब ५ करोड रहेको छ ।

त्यस्तै राष्ट्र बैंकले बैंक तथा वित्तीय संस्थाको निक्षेप संकलन ७ दशमलव ६ प्रतिशतले बढेको जनाएको छ । र, निजी क्षेत्रमा प्रवाहित कर्जा ४ दशमलव २ प्रतिशतले बढेको पाइएको छ । 

वार्षिक बिन्दुगत आधारमा निक्षेपको वृद्धिदर १४.६ प्रतिशत र निजी क्षेत्रमा प्रवाहित कर्जाको वृद्धिदर ५ दशमलव २ प्रतिशत रहेको राष्ट्र बैंकले जनाएको छ ।