नेकपा एमालेका अध्यक्ष केपी शर्मा ओलीले राष्ट्रको एकतामाथि धावा बोल्ने प्रवृत्ति हावी भएको र देश असफल बन्ने अवस्था देखिएपछि कांग्रेस–माओवादीको गठबन्धन तोड्नु परेको बताएका छन् ।

नयाँ बनेको समीकरण सफलतापूर्वक अगाडि बढिरहेको उनले बताए ।

नेकपा एमाले कास्कीको ११ औं जिल्ला सम्मेलनबाट निर्वाचित पदाधिकारीको शपथ कार्यक्रमलाई शुक्रवार पोखरामा सम्बोधन गर्दै ओलीले देश नेपाली आफैंले जोगाउनुपर्छ भन्ने मान्यता स्थापित गर्न नयाँ समीकरण बनाउनु परेको बताएका हुन् । 

‘राष्ट्रको एकतामाथि धावा बोल्न प्रवृत्ति देखा परे, विकास होइन विनाशको बाटोमा लागेको देखियो । आर्थिक रुपमा देश ओरालो लाग्ने र असफल राष्ट्र हुने हो कि भन्ने स्थिति सृजना भयो । अपसंस्कृति देशमा ल्याइयो, त्यसबाट जोगाउन जरुरी थियो । हाम्रो सभ्यतामाथि हमला भयो, कतै धर्मका नाममा कतै साम्प्रदायिक भावनाले देशलाई विखण्डन गर्न खोज्ने, क्षेत्रीयताको नाममा विभाजन गर्न खोज्ने त्यस प्रकरणका प्रयास भए’ ओलीले भने, ‘गठबन्धन तोड्नैपर्ने भयो, देश आफैं नेपालीले जोगाउनु पर्छ भन्ने मान्यता स्थापित गर्न नयाँ समीकरण बनाउनु पर्ने भयो । अहिले बनेको गठबन्धन होइन राजनीतिक समीकरण हो ।’

ओलीले यसअघिको गठबन्धन एमाले र देश विरोधी रहेको आरोप लगाए । ‘त्यो गठबन्धन नीतिहित थियो, एमाले र देश विरोधी कुरा थियो । अहिलेको राजनीतिक समीकरण हो । पार्टीका आफ्ना नीति र उद्देश्य छन, आफ्ना नीति नछाडी अहिलेको सरकारमा बसेर विकासको कामलाई अगाडि बढाउने । सांस्कृतिक अपचलनलाई फेरि फर्काएर सुधार गर्नुपर्ने अभिभारा आयो र त्यसका लागि हामी सरकारमा सहभागी भयौं । गठबन्धन सफलतापूर्वक अगाडि बढेको छ’, ओलीले भने ।