युरोपेली फूटबल महासंघ (यूईएफए)ले युरोपियन च्याम्पियनसिप (युरोकप)मा सहभागी हुने टोलीमा खेलाडीको सङ्ख्या बढाउने तयारी गरिरहेको छ ।

यूईएफएले यसअघि सन् २०२१ मा भएको युरोकपमा राखिएको २६ खेलाडीको स्क्वाडलाई निरन्तरता दिन लागेको हो ।  

यस विषयमा यूईएफएले यसै वर्षको जुन र जुलाईमा जर्मनीमा हुन गइरहेको युरोकपमा सहभागी २४ टोलीका प्रशिक्षकहरूसँग पनि छलफल गरिसकेको छ ।

छलफलका क्रममा विभिन्न सुझाव आएको र टोलीमा खेलाडीको सङ्ख्या २६ राख्नु उपयुक्त हुने सुझाव धेरै प्राप्त भएको यूईएफएले जनाएको छ ।

‘यस विषयमा अर्को सातासम्ममा ठोस निर्णय आइसक्ने छ,’ यूईएफएले जारी गरेको विज्ञप्तिमा उल्लेख छ ।

सन् २०२१ अघिको संस्करणमा प्रत्येक राष्ट्रले आफ्नो टोलीमा २३ जना खेलाडीमात्र समावेश गर्न पाउँथे । सन् २०२० मा हुनुपर्ने युरोकप कोरोना भाइरसका कारण एक वर्षपछि सरेको थियो । कोरोनाकै कारण सन् २०२१ मा भएको प्रतियोगितामा पहिलोपटक २६ खेलाडी समावेश गरिएको थियो । अब त्यसैलाई कायम राख्ने तयारी भएको हो ।

सन् २०२२ मा भएको विश्वकपमा पनि स्क्वाडमा २६ खेलाडी समावेश गरिएका थिए । 

इंग््ल्यान्डका प्रशिक्षक गारेथ साउथगेट भने यसअघि टोलीमा २३ खेलाडी समावेश गर्नुपर्ने पक्षमा थिए ।

तर, अहिले २६ सदस्यीय टोली बनाउनु पर्ने पक्षमा उनी पनि सकारात्मक देखिएको बेलायती सञ्चारमाध्यमले जनाएका छन् ।

युरोकप प्रतियोगिता जर्मनीका विभिन्न १० वटा सहरमा खेलाउने कार्यक्रम रहेको छ । इटाली यसको साविक विजेता हो ।