राष्ट्रिय युवा परिषदद्वारा सञ्चालित चार दिवसीय नमुना संयुक्त राष्ट्रसङ्घीय अभ्यास -२०२४(NYCMUN-2024) सम्पन्न भएको छ। खुला अनलाइन आवेदनका आधारमा देशभरका  ७१ जिल्लाबाट  छनौट भएका १६-२४ उमेरका २०० जना युवा कार्यक्रममा सहभागी थिए । नमुना संयुक्त राष्ट्रसङ्घको महासचिवको भूमिका ललितपुरकी नुज्जु अवालेले निर्वाह गरेकी थिइन्।

सानो ठिमी भक्तपुर स्थित एसओएस वालग्राम हाताभित्र नेपाल सरकारका उपप्रधान तथा परराष्ट्र मन्त्री नारायणकाजी श्रेष्ठले विधिवत् समारोहका विच कार्यक्रमको उद्घाटन गरेका थिए ।  सो अवसरमा उपप्रधानमन्त्री श्रेष्ठले नमुना संयुक्त राष्ट्रसङ्घको अभ्यासले नेपाली युवाहरूलाई अन्तर्राष्ट्रिय कूटनीति र नेतृत्व विकासमा महत्त्वपूर्ण टेवा पुग्ने बताए। बिहीबार कार्यक्रमको समापन समारोहमा युवा तथा खेलकुद मन्त्री बिराज भक्त श्रेष्ठले युवालाई नेतृत्वदायी र प्रतिस्पर्धी भूमिकामा स्थापित गराउन यस्ता कार्यक्रमले महत्त्वपूर्ण भूमिका खेल्ने बताए। मन्त्री श्रेष्ठले युवा स्वरोजगार र सशक्तीकरण मन्त्रालयको मुख्य ध्यान रहेको बताए । 

संयुक्त  राष्ट्रसङ्घको नेपाल स्थित आवासीय कार्यालयको तर्फबाट संयुक्त राष्ट्रसङ्घीय विकास कार्यक्रमका आवासीय प्रतिनिधि आईसाने मेडागान्गोडा लबेले नेपाली युवाहरूले राष्ट्रसङ्घीय अभ्यास बुझ्नु अत्यन्तै आवश्यक रहेको बताइन्। लबेले युवा पुस्ताले विश्व शान्ति र सद्भाव कायम राख्न महत्त्वपूर्ण भूमिका खेल्न सक्ने बताइन् ।  राष्ट्रिय युवा परिषदका कार्यकारी उपाध्यक्ष सुरेन्द्र बस्नेतले युवाहरूलाई राष्ट्रसङ्घीय अभ्यास , दिगो विकास लक्ष्य, कूटनीतिक आयाम , साझा अन्तर्राष्ट्रिय सवालहरू, जलवायु परिवर्तन, मानव अधिकार , सुरक्षा परिषद् लगायतका विषयमा प्रशिक्षित गराउने उद्देश्यले  कार्यक्रम आयोजना गरिएको बताए।

चार दिने कार्यक्रममा सहभागी युवालाई विभिन्न छ वटा समितिमा विभाजन गरि अलग अलग विषयमा छलफल तथा अभ्यास गराइएको थियो ।  संयुक्तराष्ट्र संघ अन्तर्गत महिला समिति, सुरक्षा परिषद् समिति, मानवअधिकार परिषद् समिति, वातावरणीय कार्यक्रम समिति , आर्थिक तथा वित्तीय समिति समिति, अन्तर्राष्ट्रिय प्रेस समिति जस्ता फरक फरक क्षेत्रमा युवाहरूले अभ्यास गरेका थिए । उपरोक्त समितिहरूमा सांसद सुनिता बराल, बैङ्कर्स तथा उद्यमी अनिल केशरी शाह, भाइराजा पाण्डे, सुनिल शर्मा, रौनिक राज अर्याल लगायतले विषयगत सहजिकरण समेत गरेका थिए ।

कार्यक्रममा विश्व वन्य जन्तु कोषका राष्ट्रिय निर्देशक डा. घनश्याम गुरुङ,  एसओएस् वालग्रामका राष्ट्रिय निर्देशक डा.गंगावहादुर गुरुङ् , युवा तथा खेलकुद मन्त्रीका सल्लाहकार निर्देश सिलवाल, परिषद् सदस्य सजिना थापा मगर, प्रशासकीय प्रमुख दिनेश घिमिरे, क्रियजन का अध्यक्ष आनन्द भिश्र,  युथ थिङ्कर्स सोसाइटिका क्षितिज भट्टराई लगायतले शुभकामना दिएका थिए।